Read כֶּתֶר אֲרָם צוֹבָא - Tanah Aleppo Codex משלי 5 Bible Online

משלי 5 - כֶּתֶר אֲרָם צוֹבָא - Tanah Aleppo Codex bible

משלי 5

¹א בני לחכמתי הקשיבה לתבונתי הט-אזנך

²ב לשמר מזמות ודעת שפתיך ינצרו

³ג כי נפת תטפנה שפתי זרה וחלק משמן חכה

⁴ד ואחריתה מרה כלענה חדה כחרב פיות

⁵ה רגליה ירדות מות שאול צעדיה יתמכו

⁶ו ארח חיים פן-תפלס נעו מעגלתיה לא תדע

⁷ז ועתה בנים שמעו-לי ואל-תסורו מאמרי-פי

⁸ח הרחק מעליה דרכך ואל-תקרב אל-פתח ביתה

⁹ט פן-תתן לאחרים הודך ושנתיך לאכזרי

¹⁰י פן-ישבעו זרים כחך ועצביך בבית נכרי

¹¹יא ונהמת באחריתך בכלות בשרך ושארך

¹²יב ואמרת--איך שנאתי מוסר ותוכחת נאץ לבי

¹³יג ולא-שמעתי בקול מורי ולמלמדי לא-הטיתי אזני

¹⁴יד כמעט הייתי בכל-רע-- בתוך קהל ועדה

¹⁵טו שתה-מים מבורך ונזלים מתוך בארך

¹⁶טז יפוצו מעינתיך חוצה ברחבות פלגי-מים

¹⁷יז יהיו-לך לבדך ואין לזרים אתך

¹⁸יח יהי-מקורך ברוך ושמח מאשת נעורך

¹⁹יט אילת אהבים ויעלת-חן דדיה ירוך בכל-עת באהבתה תשגה תמיד

²⁰כ ולמה תשגה בני בזרה ותחבק חק נכריה

²¹כא כי נכח עיני יהוה--דרכי-איש וכל-מעגלתיו מפלס

²²כב עוונתיו--ילכדנו את-הרשע ובחבלי חטאתו יתמך

²³כג הוא--ימות באין מוסר וברב אולתו ישגה