Read כֶּתֶר אֲרָם צוֹבָא - Tanah Aleppo Codex משלי 6 Bible Online

משלי 6 - כֶּתֶר אֲרָם צוֹבָא - Tanah Aleppo Codex bible

משלי 6

¹א בני אם-ערבת לרעך תקעת לזר כפיך

²ב נוקשת באמרי-פיך נלכדת באמרי-פיך

³ג עשה זאת אפוא בני והנצל-- כי באת בכף-רעך לך התרפס ורהב רעיך

⁴ד אל-תתן שנה לעיניך ותנומה לעפעפיך

⁵ה הנצל כצבי מיד וכצפור מיד יקוש

⁶ו לך-אל-נמלה עצל ראה דרכיה וחכם

⁷ז אשר אין-לה קצין-- שטר ומשל

⁸ח תכין בקיץ לחמה אגרה בקציר מאכלה

⁹ט עד-מתי עצל תשכב מתי תקום משנתך

¹⁰י מעט שנות מעט תנומות מעט חבק ידים לשכב

¹¹יא ובא-כמהלך ראשך ומחסרך כאיש מגן

¹²יב אדם בליעל איש און הולך עקשות פה

¹³יג קרץ בעינו מלל ברגלו מרה באצבעתיו

¹⁴יד תהפכות בלבו--חרש רע בכל-עת מדנים (מדינים) ישלח

¹⁵טו על-כן--פתאם יבוא אידו פתע ישבר ואין מרפא

¹⁶טז שש-הנה שנא יהוה ושבע תועבות (תועבת) נפשו

¹⁷יז עינים רמות לשון שקר וידים שפכות דם-נקי

¹⁸יח לב--חרש מחשבות און רגלים ממהרות לרוץ לרעה

¹⁹יט יפיח כזבים עד שקר ומשלח מדנים בין אחים

²⁰כ נצר בני מצות אביך ואל-תטש תורת אמך

²¹כא קשרם על-לבך תמיד ענדם על-גרגרתך

²²כב בהתהלכך תנחה אתך-- בשכבך תשמר עליך והקיצות היא תשיחך

²³כג כי נר מצוה ותורה אור ודרך חיים תוכחות מוסר

²⁴כד לשמרך מאשת רע מחלקת לשון נכריה

²⁵כה אל-תחמד יפיה בלבבך ואל-תקחך בעפעפיה

²⁶כו כי בעד-אשה זונה עד-ככר-לחם ואשת איש-- נפש יקרה תצוד

²⁷כז היחתה איש אש בחיקו ובגדיו לא תשרפנה

²⁸כח אם-יהלך איש על-הגחלים ורגליו לא תכוינה

²⁹כט כן--הבא אל-אשת רעהו לא-ינקה כל-הנגע בה

³⁰ל לא-יבוזו לגנב כי יגנוב-- למלא נפשו כי ירעב

³¹לא ונמצא ישלם שבעתים את-כל-הון ביתו יתן

³²לב נאף אשה חסר-לב משחית נפשו הוא יעשנה

³³לג נגע-וקלון ימצא וחרפתו לא תמחה

³⁴לד כי-קנאה חמת-גבר ולא-יחמול ביום נקם

³⁵לה לא-ישא פני כל-כפר ולא-יאבה כי תרבה-שחד