Read כֶּתֶר אֲרָם צוֹבָא - Tanah Aleppo Codex משלי 7 Bible Online

משלי 7 - כֶּתֶר אֲרָם צוֹבָא - Tanah Aleppo Codex bible

משלי 7

¹א בני שמר אמרי ומצותי תצפן אתך

²ב שמר מצותי וחיה ותורתי כאישון עיניך

³ג קשרם על-אצבעתיך כתבם על-לוח לבך

⁴ד אמר לחכמה אחתי את ומדע לבינה תקרא

⁵ה לשמרך מאשה זרה מנכריה אמריה החליקה

⁶ו כי בחלון ביתי-- בעד אשנבי נשקפתי

⁷ז וארא בפתאים אבינה בבנים-- נער חסר-לב

⁸ח עבר בשוק אצל פנה ודרך ביתה יצעד

⁹ט בנשף-בערב יום באישון לילה ואפלה

¹⁰י והנה אשה לקראתו שית זונה ונצרת לב

¹¹יא המיה היא וסררת בביתה לא-ישכנו רגליה

¹²יב פעם בחוץ--פעם ברחבות ואצל כל-פנה תארב

¹³יג והחזיקה בו ונשקה לו העזה פניה ותאמר לו

¹⁴יד זבחי שלמים עלי היום שלמתי נדרי

¹⁵טו על-כן יצאתי לקראתך לשחר פניך ואמצאך

¹⁶טז מרבדים רבדתי ערשי חטבות אטון מצרים

¹⁷יז נפתי משכבי-- מר אהלים וקנמון

¹⁸יח לכה נרוה דדים עד-הבקר נתעלסה באהבים

¹⁹יט כי אין האיש בביתו הלך בדרך מרחוק

²⁰כ צרור-הכסף לקח בידו ליום הכסא יבא ביתו

²¹כא הטתו ברב לקחה בחלק שפתיה תדיחנו

²²כב הולך אחריה פתאם כשור אל-טבח יבא וכעכס אל-מוסר אויל

²³כג עד יפלח חץ כבדו-- כמהר צפור אל-פח ולא-ידע כי-בנפשו הוא

²⁴כד ועתה בנים שמעו-לי והקשיבו לאמרי-פי

²⁵כה אל-ישט אל-דרכיה לבך אל-תתע בנתיבותיה

²⁶כו כי-רבים חללים הפילה ועצמים כל-הרגיה

²⁷כז דרכי שאול ביתה ירדות אל-חדרי-מות