Read כֶּתֶר אֲרָם צוֹבָא - Tanah Aleppo Codex משלי 8 Bible Online

משלי 8 - כֶּתֶר אֲרָם צוֹבָא - Tanah Aleppo Codex bible

משלי 8

¹א הלא-חכמה תקרא ותבונה תתן קולה

²ב בראש-מרמים עלי-דרך בית נתיבות נצבה

³ג ליד-שערים לפי-קרת מבוא פתחים תרנה

⁴ד אליכם אישים אקרא וקולי אל-בני אדם

⁵ה הבינו פתאים ערמה וכסילים הבינו לב

⁶ו שמעו כי-נגידים אדבר ומפתח שפתי מישרים

⁷ז כי-אמת יהגה חכי ותועבת שפתי רשע

⁸ח בצדק כל-אמרי-פי אין בהם נפתל ועקש

⁹ט כלם נכחים למבין וישרים למצאי דעת

¹⁰י קחו-מוסרי ואל-כסף ודעת מחרוץ נבחר

¹¹יא כי-טובה חכמה מפנינים וכל-חפצים לא ישוו-בה

¹²יב אני-חכמה שכנתי ערמה ודעת מזמות אמצא

¹³יג יראת יהוה שנאת-רע גאה וגאון ודרך רע ופי תהפכות שנאתי

¹⁴יד לי-עצה ותושיה אני בינה לי גבורה

¹⁵טו בי מלכים ימלכו ורזנים יחקקו צדק

¹⁶טז בי שרים ישרו ונדיבים כל-שפטי צדק

¹⁷יז אני אהביה (אהבי) אהב ומשחרי ימצאנני

¹⁸יח עשר-וכבוד אתי הון עתק וצדקה

¹⁹יט טוב פריי מחרוץ ומפז ותבואתי מכסף נבחר

²⁰כ בארח-צדקה אהלך בתוך נתיבות משפט

²¹כא להנחיל אהבי יש ואצרתיהם אמלא

²²כב יהוה--קנני ראשית דרכו קדם מפעליו מאז

²³כג מעולם נסכתי מראש-- מקדמי-ארץ

²⁴כד באין-תהמות חוללתי באין מעינות נכבדי-מים

²⁵כה בטרם הרים הטבעו לפני גבעות חוללתי

²⁶כו עד-לא עשה ארץ וחוצות וראש עפרות תבל

²⁷כז בהכינו שמים שם אני בחקו חוג על-פני תהום

²⁸כח באמצו שחקים ממעל בעזוז עינות תהום

²⁹כט בשומו לים חקו ומים לא יעברו-פיו בחוקו מוסדי ארץ

³⁰ל ואהיה אצלו אמון ואהיה שעשועים יום יום משחקת לפניו בכל-עת

³¹לא משחקת בתבל ארצו ושעשעי את-בני אדם

³²לב ועתה בנים שמעו-לי ואשרי דרכי ישמרו

³³לג שמעו מוסר וחכמו ואל-תפרעו

³⁴לד אשרי אדם שמע-לי לשקד על-דלתתי יום יום--לשמר מזוזת פתחי

³⁵לה כי מצאי מצאי (מצא) חיים ויפק רצון מיהוה

³⁶לו וחטאי חמס נפשו כל-משנאי אהבו מות