Read כֶּתֶר אֲרָם צוֹבָא - Tanah Aleppo Codex משלי 9 Bible Online

משלי 9 - כֶּתֶר אֲרָם צוֹבָא - Tanah Aleppo Codex bible

משלי 9

¹א חכמות בנתה ביתה חצבה עמודיה שבעה

²ב טבחה טבחה מסכה יינה אף ערכה שלחנה

³ג שלחה נערתיה תקרא-- על-גפי מרמי קרת

⁴ד מי-פתי יסר הנה חסר-לב אמרה לו

⁵ה לכו לחמו בלחמי ושתו ביין מסכתי

⁶ו עזבו פתאים וחיו ואשרו בדרך בינה

⁷ז יסר לץ--לקח לו קלון ומוכיח לרשע מומו

⁸ח אל-תוכח לץ פן-ישנאך הוכח לחכם ויאהבך

⁹ט תן לחכם ויחכם-עוד הודע לצדיק ויוסף לקח

¹⁰י תחלת חכמה יראת יהוה ודעת קדשים בינה

¹¹יא כי-בי ירבו ימיך ויוסיפו לך שנות חיים

¹²יב אם-חכמת חכמת לך ולצת לבדך תשא

¹³יג אשת כסילות המיה פתיות ובל-ידעה מה

¹⁴יד וישבה לפתח ביתה-- על-כסא מרמי קרת

¹⁵טו לקרא לעברי-דרך המישרים ארחותם

¹⁶טז מי-פתי יסר הנה וחסר-לב ואמרה לו

¹⁷יז מים-גנובים ימתקו ולחם סתרים ינעם

¹⁸יח ולא-ידע כי-רפאים שם בעמקי שאול קראיה