Read כֶּתֶר אֲרָם צוֹבָא - Tanah Aleppo Codex קהלת 4 Bible Online

קהלת 4 - כֶּתֶר אֲרָם צוֹבָא - Tanah Aleppo Codex bible

קהלת 4

¹א ושבתי אני ואראה את כל העשקים אשר נעשים תחת השמש והנה דמעת העשקים ואין להם מנחם ומיד עשקיהם כח ואין להם מנחם

²ב ושבח אני את המתים שכבר מתו--מן החיים אשר המה חיים עדנה

³ג וטוב משניהם--את אשר עדן לא היה אשר לא ראה את המעשה הרע אשר נעשה תחת השמש

⁴ד וראיתי אני את כל עמל ואת כל כשרון המעשה--כי היא קנאת איש מרעהו גם זה הבל ורעות רוח

⁵ה הכסיל חבק את ידיו ואכל את בשרו

⁶ו טוב מלא כף נחת--ממלא חפנים עמל ורעות רוח

⁷ז ושבתי אני ואראה הבל תחת השמש

⁸ח יש אחד ואין שני גם בן ואח אין לו ואין קץ לכל עמלו--גם עיניו (עינו) לא תשבע עשר ולמי אני עמל ומחסר את נפשי מטובה--גם זה הבל וענין רע הוא

⁹ט טובים השנים מן האחד אשר יש להם שכר טוב בעמלם

¹⁰י כי אם יפלו האחד יקים את חברו ואילו האחד שיפול ואין שני להקימו

¹¹יא גם אם ישכבו שנים וחם להם ולאחד איך יחם

¹²יב ואם יתקפו האחד--השנים יעמדו נגדו והחוט המשלש לא במהרה ינתק

¹³יג טוב ילד מסכן וחכם--ממלך זקן וכסיל אשר לא ידע להזהר עוד

¹⁴יד כי מבית הסורים יצא למלך כי גם במלכותו נולד רש

¹⁵טו ראיתי את כל החיים המהלכים תחת השמש--עם הילד השני אשר יעמד תחתיו

¹⁶טז אין קץ לכל העם לכל אשר היה לפניהם--גם האחרונים לא ישמחו בו כי גם זה הבל ורעיון רוח [ (Ecclesiastes 4:17) יז שמר רגליך (רגלך) כאשר תלך אל בית האלהים וקרוב לשמע מתת הכסילים זבח כי אינם יודעים לעשות רע ]