Read כֶּתֶר אֲרָם צוֹבָא - Tanah Aleppo Codex קהלת 8 Bible Online

קהלת 8 - כֶּתֶר אֲרָם צוֹבָא - Tanah Aleppo Codex bible

קהלת 8

¹א מי כהחכם ומי יודע פשר דבר חכמת אדם תאיר פניו ועז פניו ישנא

²ב אני פי מלך שמר ועל דברת שבועת אלהים

³ג אל תבהל מפניו תלך אל תעמד בדבר רע כי כל אשר יחפץ יעשה

⁴ד באשר דבר מלך שלטון ומי יאמר לו מה תעשה

⁵ה שומר מצוה לא ידע דבר רע ועת ומשפט ידע לב חכם

⁶ו כי לכל חפץ יש עת ומשפט כי רעת האדם רבה עליו

⁷ז כי איננו ידע מה שיהיה כי כאשר יהיה מי יגיד לו

⁸ח אין אדם שליט ברוח לכלוא את הרוח ואין שלטון ביום המות ואין משלחת במלחמה ולא ימלט רשע את בעליו

⁹ט את כל זה ראיתי ונתון את לבי לכל מעשה אשר נעשה תחת השמש עת אשר שלט האדם באדם--לרע לו

¹⁰י ובכן ראיתי רשעים קברים ובאו וממקום קדוש יהלכו וישתכחו בעיר אשר כן עשו גם זה הבל

¹¹יא אשר אין נעשה פתגם מעשה הרעה מהרה על כן מלא לב בני האדם בהם--לעשות רע

¹²יב אשר חטא עשה רע מאת--ומאריך לו כי גם יודע אני אשר יהיה טוב ליראי האלהים אשר ייראו מלפניו

¹³יג וטוב לא יהיה לרשע ולא יאריך ימים כצל--אשר איננו ירא מלפני אלהים

¹⁴יד יש הבל אשר נעשה על הארץ אשר יש צדיקים אשר מגיע אלהם כמעשה הרשעים ויש רשעים שמגיע אלהם כמעשה הצדיקים אמרתי שגם זה הבל

¹⁵טו ושבחתי אני את השמחה אשר אין טוב לאדם תחת השמש כי אם לאכל ולשתות ולשמוח והוא ילונו בעמלו ימי חייו אשר נתן לו האלהים--תחת השמש

¹⁶טז כאשר נתתי את לבי לדעת חכמה ולראות את הענין אשר נעשה על הארץ כי גם ביום ובלילה--שנה בעיניו איננו ראה

¹⁷יז וראיתי את כל מעשה האלהים כי לא יוכל האדם למצוא את המעשה אשר נעשה תחת השמש בשל אשר יעמל האדם לבקש ולא ימצא וגם אם יאמר החכם לדעת לא יוכל למצא