Read כֶּתֶר אֲרָם צוֹבָא - Tanah Aleppo Codex ישעיהו 1 Bible Online

ישעיהו 1 - כֶּתֶר אֲרָם צוֹבָא - Tanah Aleppo Codex bible

ישעיהו 1

¹א חזון ישעיהו בן אמוץ אשר חזה על יהודה וירושלם--בימי עזיהו יותם אחז יחזקיהו מלכי יהודה

²ב שמעו שמים והאזיני ארץ כי יהוה דבר בנים גדלתי ורוממתי והם פשעו בי

³ג ידע שור קנהו וחמור אבוס בעליו ישראל לא ידע עמי לא התבונן

⁴ד הוי גוי חטא עם כבד עון--זרע מרעים בנים משחיתים עזבו את יהוה נאצו את קדוש ישראל--נזרו אחור

⁵ה על מה תכו עוד תוסיפו סרה כל ראש לחלי וכל לבב דוי

⁶ו מכף רגל ועד ראש אין בו מתם פצע וחבורה ומכה טריה לא זרו ולא חבשו ולא רככה בשמן

⁷ז ארצכם שממה עריכם שרפות אש אדמתכם לנגדכם זרים אכלים אתה ושממה כמהפכת זרים

⁸ח ונותרה בת ציון כסכה בכרם כמלונה במקשה כעיר נצורה

⁹ט לולי יהוה צבאות הותיר לנו שריד כמעט--כסדם היינו לעמרה דמינו {פ}

¹⁰י שמעו דבר יהוה קציני סדם האזינו תורת אלהינו עם עמרה

¹¹יא למה לי רב זבחיכם יאמר יהוה שבעתי עלות אילים וחלב מריאים ודם פרים וכבשים ועתודים לא חפצתי

¹²יב כי תבאו לראות פני--מי בקש זאת מידכם רמס חצרי

¹³יג לא תוסיפו הביא מנחת שוא--קטרת תועבה היא לי חדש ושבת קרא מקרא לא אוכל און ועצרה

¹⁴יד חדשיכם ומועדיכם שנאה נפשי היו עלי לטרח נלאיתי נשא

¹⁵טו ובפרשכם כפיכם אעלים עיני מכם--גם כי תרבו תפלה אינני שמע ידיכם דמים מלאו

¹⁶טז רחצו הזכו--הסירו רע מעלליכם מנגד עיני חדלו הרע

¹⁷יז למדו היטב דרשו משפט אשרו חמוץ שפטו יתום ריבו אלמנה {ס}

¹⁸יח לכו נא ונוכחה יאמר יהוה אם יהיו חטאיכם כשנים כשלג ילבינו אם יאדימו כתולע כצמר יהיו

¹⁹יט אם תאבו ושמעתם--טוב הארץ תאכלו

²⁰כ ואם תמאנו ומריתם--חרב תאכלו כי פי יהוה דבר {פ}

²¹כא איכה היתה לזונה קריה נאמנה מלאתי משפט צדק ילין בה--ועתה מרצחים

²²כב כספך היה לסיגים סבאך מהול במים

²³כג שריך סוררים וחברי גנבים--כלו אהב שחד ורדף שלמנים יתום לא ישפטו וריב אלמנה לא יבוא אליהם {ס}

²⁴כד לכן נאם האדון יהוה צבאות--אביר ישראל הוי אנחם מצרי ואנקמה מאויבי

²⁵כה ואשיבה ידי עליך ואצרף כבר סיגיך ואסירה כל בדיליך

²⁶כו ואשיבה שפטיך כבראשנה ויעציך כבתחלה אחרי כן יקרא לך עיר הצדק--קריה נאמנה

²⁷כז ציון במשפט תפדה ושביה בצדקה

²⁸כח ושבר פשעים וחטאים יחדו ועזבי יהוה יכלו

²⁹כט כי יבשו מאילים אשר חמדתם ותחפרו--מהגנות אשר בחרתם

³⁰ל כי תהיו כאלה נבלת עלה וכגנה אשר מים אין לה

³¹לא והיה החסן לנערת ופעלו לניצוץ ובערו שניהם יחדו ואין מכבה {פ}