Read כֶּתֶר אֲרָם צוֹבָא - Tanah Aleppo Codex ישעיהו 10 Bible Online

ישעיהו 10 - כֶּתֶר אֲרָם צוֹבָא - Tanah Aleppo Codex bible

ישעיהו 10

¹א הוי החקקים חקקי און ומכתבים עמל כתבו

²ב להטות מדין דלים ולגזל משפט עניי עמי--להיות אלמנות שללם ואת יתומים יבזו

³ג ומה תעשו ליום פקדה ולשואה ממרחק תבוא על מי תנוסו לעזרה ואנה תעזבו כבודכם

⁴ד בלתי כרע תחת אסיר ותחת הרוגים יפלו בכל זאת לא שב אפו ועוד ידו נטויה {פ}

⁵ה הוי אשור שבט אפי ומטה הוא בידם זעמי

⁶ו בגוי חנף אשלחנו ועל עם עברתי אצונו--לשלל שלל ולבז בז ולשימו (ולשומו) מרמס כחמר חוצות

⁷ז והוא לא כן ידמה ולבבו לא כן יחשב כי להשמיד בלבבו ולהכרית גוים לא מעט

⁸ח כי יאמר הלא שרי יחדו מלכים

⁹ט הלא ככרכמיש כלנו אם לא כארפד חמת אם לא כדמשק שמרון

¹⁰י כאשר מצאה ידי לממלכת האליל ופסיליהם מירושלם ומשמרון

¹¹יא הלא כאשר עשיתי לשמרון--ולאליליה כן אעשה לירושלם ולעצביה {פ}

¹²יב והיה כי יבצע אדני את כל מעשהו בהר ציון ובירושלם--אפקד על פרי גדל לבב מלך אשור ועל תפארת רום עיניו

¹³יג כי אמר בכח ידי עשיתי ובחכמתי כי נבנותי ואסיר גבולת עמים ועתידתיהם (ועתודתיהם) שושתי ואוריד כאביר יושבים

¹⁴יד ותמצא כקן ידי לחיל העמים וכאסף ביצים עזבות כל הארץ אני אספתי ולא היה נדד כנף ופצה פה ומצפצף

¹⁵טו היתפאר הגרזן על החצב בו אם יתגדל המשור על מניפו כהניף שבט ואת מרימיו כהרים מטה לא עץ {פ}

¹⁶טז לכן ישלח האדון יהוה צבאות במשמניו--רזון ותחת כבדו יקד יקד כיקוד אש

¹⁷יז והיה אור ישראל לאש וקדושו ללהבה ובערה ואכלה שיתו ושמירו--ביום אחד

¹⁸יח וכבוד יערו וכרמלו מנפש ועד בשר יכלה והיה כמסס נסס

¹⁹יט ושאר עץ יערו מספר יהיו ונער יכתבם {ס}

²⁰כ והיה ביום ההוא לא יוסיף עוד שאר ישראל ופליטת בית יעקב להשען על מכהו ונשען על יהוה קדוש ישראל--באמת

²¹כא שאר ישוב שאר יעקב--אל אל גבור

²²כב כי אם יהיה עמך ישראל כחול הים--שאר ישוב בו כליון חרוץ שוטף צדקה

²³כג כי כלה ונחרצה--אדני יהוה צבאות עשה בקרב כל הארץ {פ}

²⁴כד לכן כה אמר אדני יהוה צבאות אל תירא עמי ישב ציון מאשור בשבט יככה ומטהו ישא עליך בדרך מצרים

²⁵כה כי עוד מעט מזער וכלה זעם ואפי על תבליתם

²⁶כו ועורר עליו יהוה צבאות שוט כמכת מדין בצור עורב ומטהו על הים ונשאו בדרך מצרים

²⁷כז והיה ביום ההוא יסור סבלו מעל שכמך ועלו מעל צוארך וחבל על מפני שמן

²⁸כח בא על עית עבר במגרון למכמש יפקיד כליו

²⁹כט עברו מעברה גבע מלון לנו חרדה הרמה--גבעת שאול נסה

³⁰ל צהלי קולך בת גלים הקשיבי לישה עניה ענתות

³¹לא נדדה מדמנה ישבי הגבים העיזו

³²לב עוד היום בנב לעמד ינפף ידו הר בית (בת) ציון גבעת ירושלם {פ}

³³לג הנה האדון יהוה צבאות מסעף פארה במערצה ורמי הקומה גדועים והגבהים ישפלו

³⁴לד ונקף סבכי היער בברזל והלבנון באדיר יפול {ס}