Read כֶּתֶר אֲרָם צוֹבָא - Tanah Aleppo Codex ישעיהו 13 Bible Online

ישעיהו 13 - כֶּתֶר אֲרָם צוֹבָא - Tanah Aleppo Codex bible

ישעיהו 13

¹א משא בבל--אשר חזה ישעיהו בן אמוץ

²ב על הר נשפה שאו נס הרימו קול להם הניפו יד ויבאו פתחי נדיבים

³ג אני צויתי למקדשי גם קראתי גבורי לאפי עליזי גאותי

⁴ד קול המון בהרים דמות עם רב קול שאון ממלכות גוים נאספים--יהוה צבאות מפקד צבא מלחמה

⁵ה באים מארץ מרחק מקצה השמים יהוה וכלי זעמו לחבל כל הארץ {ס}

⁶ו הילילו כי קרוב יום יהוה כשד משדי יבוא

⁷ז על כן כל ידים תרפינה וכל לבב אנוש ימס

⁸ח ונבהלו--צירים וחבלים יאחזון כיולדה יחילון איש אל רעהו יתמהו פני להבים פניהם

⁹ט הנה יום יהוה בא אכזרי ועברה וחרון אף--לשום הארץ לשמה וחטאיה ישמיד ממנה

¹⁰י כי כוכבי השמים וכסיליהם לא יהלו אורם חשך השמש בצאתו וירח לא יגיה אורו

¹¹יא ופקדתי על תבל רעה ועל רשעים עונם והשבתי גאון זדים וגאות עריצים אשפיל

¹²יב אוקיר אנוש מפז ואדם מכתם אופיר

¹³יג על כן שמים ארגיז ותרעש הארץ ממקומה--בעברת יהוה צבאות וביום חרון אפו

¹⁴יד והיה כצבי מדח וכצאן ואין מקבץ איש אל עמו יפנו ואיש אל ארצו ינוסו

¹⁵טו כל הנמצא ידקר וכל הנספה יפול בחרב

¹⁶טז ועלליהם ירטשו לעיניהם ישסו בתיהם ונשיהם תשגלנה (תשכבנה)

¹⁷יז הנני מעיר עליהם את מדי אשר כסף לא יחשבו וזהב לא יחפצו בו

¹⁸יח וקשתות נערים תרטשנה ופרי בטן לא ירחמו על בנים לא תחוס עינם

¹⁹יט והיתה בבל צבי ממלכות תפארת גאון כשדים כמהפכת אלהים את סדם ואת עמרה

²⁰כ לא תשב לנצח ולא תשכן עד דור ודור ולא יהל שם ערבי ורעים לא ירבצו שם

²¹כא ורבצו שם ציים ומלאו בתיהם אחים ושכנו שם בנות יענה ושעירים ירקדו שם

²²כב וענה איים באלמנותיו ותנים בהיכלי ענג וקרוב לבוא עתה וימיה לא ימשכו