Read כֶּתֶר אֲרָם צוֹבָא - Tanah Aleppo Codex ישעיהו 22 Bible Online

ישעיהו 22 - כֶּתֶר אֲרָם צוֹבָא - Tanah Aleppo Codex bible

ישעיהו 22

¹א משא גיא חזיון מה לך אפוא כי עלית כלך לגגות

²ב תשאות מלאה עיר הומיה--קריה עליזה חלליך לא חללי חרב ולא מתי מלחמה

³ג כל קציניך נדדו יחד מקשת אסרו כל נמצאיך אסרו יחדו מרחוק ברחו

⁴ד על כן אמרתי שעו מני אמרר בבכי אל תאיצו לנחמני על שד בת עמי

⁵ה כי יום מהומה ומבוסה ומבוכה לאדני יהוה צבאות--בגי חזיון מקרקר קר ושוע אל ההר

⁶ו ועילם נשא אשפה ברכב אדם פרשים וקיר ערה מגן

⁷ז ויהי מבחר עמקיך מלאו רכב והפרשים שת שתו השערה

⁸ח ויגל את מסך יהודה ותבט ביום ההוא אל נשק בית היער

⁹ט ואת בקיעי עיר דוד ראיתם כי רבו ותקבצו את מי הברכה התחתונה

¹⁰י ואת בתי ירושלם ספרתם ותתצו הבתים לבצר החומה

¹¹יא ומקוה עשיתם בין החמתים למי הברכה הישנה ולא הבטתם אל עשיה ויצרה מרחוק לא ראיתם

¹²יב ויקרא אדני יהוה צבאות--ביום ההוא לבכי ולמספד ולקרחה ולחגר שק

¹³יג והנה ששון ושמחה הרג בקר ושחט צאן אכל בשר ושתות יין אכול ושתו כי מחר נמות

¹⁴יד ונגלה באזני יהוה צבאות אם יכפר העון הזה לכם עד תמתון אמר אדני יהוה צבאות {פ}

¹⁵טו כה אמר אדני יהוה צבאות לך בא אל הסכן הזה על שבנא אשר על הבית

¹⁶טז מה לך פה ומי לך פה כי חצבת לך פה קבר חצבי מרום קברו חקקי בסלע משכן לו

¹⁷יז הנה יהוה מטלטלך טלטלה גבר ועטך עטה

¹⁸יח צנוף יצנפך צנפה כדור אל ארץ רחבת ידים שמה תמות ושמה מרכבות כבודך--קלון בית אדניך

¹⁹יט והדפתיך ממצבך וממעמדך יהרסך

²⁰כ והיה ביום ההוא וקראתי לעבדי לאליקים בן חלקיהו

²¹כא והלבשתיו כתנתך ואבנטך אחזקנו וממשלתך אתן בידו והיה לאב ליושב ירושלם ולבית יהודה

²²כב ונתתי מפתח בית דוד על שכמו ופתח ואין סגר וסגר ואין פתח

²³כג ותקעתיו יתד במקום נאמן והיה לכסא כבוד לבית אביו

²⁴כד ותלו עליו כל כבוד בית אביו הצאצאים והצפעות כל כלי הקטן--מכלי האגנות ועד כל כלי הנבלים

²⁵כה ביום ההוא נאם יהוה צבאות תמוש היתד התקועה במקום נאמן ונגדעה ונפלה ונכרת המשא אשר עליה--כי יהוה דבר {פ}