Read כֶּתֶר אֲרָם צוֹבָא - Tanah Aleppo Codex ישעיהו 24 Bible Online

ישעיהו 24 - כֶּתֶר אֲרָם צוֹבָא - Tanah Aleppo Codex bible

ישעיהו 24

¹א הנה יהוה בוקק הארץ ובולקה ועוה פניה והפיץ ישביה

²ב והיה כעם ככהן כעבד כאדניו כשפחה כגברתה כקונה כמוכר כמלוה כלוה כנשה כאשר נשא בו

³ג הבוק תבוק הארץ והבוז תבז כי יהוה דבר את הדבר הזה

⁴ד אבלה נבלה הארץ אמללה נבלה תבל אמללו מרום עם הארץ

⁵ה והארץ חנפה תחת ישביה כי עברו תורת חלפו חק הפרו ברית עולם

⁶ו על כן אלה אכלה ארץ ויאשמו ישבי בה על כן חרו ישבי ארץ ונשאר אנוש מזער

⁷ז אבל תירוש אמללה גפן נאנחו כל שמחי לב

⁸ח שבת משוש תפים חדל שאון עליזים שבת משוש כנור

⁹ט בשיר לא ישתו יין ימר שכר לשתיו

¹⁰י נשברה קרית תהו סגר כל בית מבוא

¹¹יא צוחה על היין בחוצות ערבה כל שמחה גלה משוש הארץ

¹²יב נשאר בעיר שמה ושאיה יכת שער

¹³יג כי כה יהיה בקרב הארץ בתוך העמים כנקף זית כעוללת אם כלה בציר

¹⁴יד המה ישאו קולם ירנו בגאון יהוה צהלו מים

¹⁵טו על כן בארים כבדו יהוה באיי הים שם יהוה אלהי ישראל {ס}

¹⁶טז מכנף הארץ זמרת שמענו צבי לצדיק ואמר רזי לי רזי לי אוי לי בגדים בגדו ובגד בוגדים בגדו

¹⁷יז פחד ופחת ופח עליך יושב הארץ

¹⁸יח והיה הנס מקול הפחד יפל אל הפחת והעולה מתוך הפחת ילכד בפח כי ארבות ממרום נפתחו וירעשו מוסדי ארץ

¹⁹יט רעה התרעעה הארץ פור התפוררה ארץ מוט התמוטטה ארץ

²⁰כ נוע תנוע ארץ כשכור והתנודדה כמלונה וכבד עליה פשעה ונפלה ולא תסיף קום {ס}

²¹כא והיה ביום ההוא יפקד יהוה על צבא המרום במרום ועל מלכי האדמה על האדמה

²²כב ואספו אספה אסיר על בור וסגרו על מסגר ומרב ימים יפקדו

²³כג וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד {פ}