Read כֶּתֶר אֲרָם צוֹבָא - Tanah Aleppo Codex ישעיהו 26 Bible Online

ישעיהו 26 - כֶּתֶר אֲרָם צוֹבָא - Tanah Aleppo Codex bible

ישעיהו 26

¹א ביום ההוא יושר השיר הזה בארץ יהודה עיר עז לנו ישועה ישית חומות וחל

²ב פתחו שערים ויבא גוי צדיק שמר אמנים

³ג יצר סמוך תצר שלום שלום כי בך בטוח

⁴ד בטחו ביהוה עדי עד כי ביה יהוה צור עולמים

⁵ה כי השח ישבי מרום קריה נשגבה ישפילנה ישפילה עד ארץ יגיענה עד עפר

⁶ו תרמסנה רגל רגלי עני פעמי דלים

⁷ז ארח לצדיק מישרים ישר מעגל צדיק תפלס

⁸ח אף ארח משפטיך יהוה קוינוך--לשמך ולזכרך תאות נפש

⁹ט נפשי אויתך בלילה אף רוחי בקרבי אשחרך כי כאשר משפטיך לארץ--צדק למדו ישבי תבל

¹⁰י יחן רשע בל למד צדק בארץ נכחות יעול ובל יראה גאות יהוה {פ}

¹¹יא יהוה רמה ידך בל יחזיון יחזו ויבשו קנאת עם אף אש צריך תאכלם {ס}

¹²יב יהוה תשפת שלום לנו כי גם כל מעשינו פעלת לנו {ס}

¹³יג יהוה אלהינו בעלונו אדנים זולתך לבד בך נזכיר שמך

¹⁴יד מתים בל יחיו--רפאים בל יקמו לכן פקדת ותשמידם ותאבד כל זכר למו

¹⁵טו יספת לגוי יהוה יספת לגוי נכבדת רחקת כל קצוי ארץ {פ}

¹⁶טז יהוה בצר פקדוך צקון לחש מוסרך למו

¹⁷יז כמו הרה תקריב ללדת תחיל תזעק בחבליה--כן היינו מפניך יהוה

¹⁸יח הרינו חלנו כמו ילדנו רוח ישועת בל נעשה ארץ ובל יפלו ישבי תבל

¹⁹יט יחיו מתיך נבלתי יקומון הקיצו ורננו שכני עפר כי טל אורת טלך וארץ רפאים תפיל {פ}

²⁰כ לך עמי בא בחדריך וסגר דלתיך (דלתך) בעדך חבי כמעט רגע עד יעבור (יעבר) זעם

²¹כא כי הנה יהוה יצא ממקומו לפקד עון ישב הארץ עליו וגלתה הארץ את דמיה ולא תכסה עוד על הרוגיה {פ}