Read כֶּתֶר אֲרָם צוֹבָא - Tanah Aleppo Codex ישעיהו 27 Bible Online

ישעיהו 27 - כֶּתֶר אֲרָם צוֹבָא - Tanah Aleppo Codex bible

ישעיהו 27

¹א ביום ההוא יפקד יהוה בחרבו הקשה והגדולה והחזקה על לויתן נחש ברח ועל לויתן נחש עקלתון והרג את התנין אשר בים {ס}

²ב ביום ההוא כרם חמר ענו לה

³ג אני יהוה נצרה לרגעים אשקנה פן יפקד עליה לילה ויום אצרנה

⁴ד חמה אין לי מי יתנני שמיר שית במלחמה--אפשעה בה אציתנה יחד

⁵ה או יחזק במעוזי יעשה שלום לי שלום יעשה לי

⁶ו הבאים ישרש יעקב יציץ ופרח ישראל ומלאו פני תבל תנובה {פ}

⁷ז הכמכת מכהו הכהו אם כהרג הרגיו הרג

⁸ח בסאסאה בשלחה תריבנה הגה ברוחו הקשה ביום קדים

⁹ט לכן בזאת יכפר עון יעקב וזה כל פרי הסר חטאתו בשומו כל אבני מזבח כאבני גר מנפצות לא יקמו אשרים וחמנים

¹⁰י כי עיר בצורה בדד נוה משלח ונעזב כמדבר שם ירעה עגל ושם ירבץ וכלה סעפיה

¹¹יא ביבש קצירה תשברנה נשים באות מאירות אותה כי לא עם בינות הוא--על כן לא ירחמנו עשהו ויצרו לא יחננו {פ}

¹²יב והיה ביום ההוא יחבט יהוה משבלת הנהר עד נחל מצרים ואתם תלקטו לאחד אחד בני ישראל {פ}

¹³יג והיה ביום ההוא יתקע בשופר גדול ובאו האבדים בארץ אשור והנדחים בארץ מצרים והשתחוו ליהוה בהר הקדש בירושלם {פ}