Read כֶּתֶר אֲרָם צוֹבָא - Tanah Aleppo Codex ישעיהו 28 Bible Online

ישעיהו 28 - כֶּתֶר אֲרָם צוֹבָא - Tanah Aleppo Codex bible

ישעיהו 28

¹א הוי עטרת גאות שכרי אפרים וציץ נבל צבי תפארתו--אשר על ראש גיא שמנים הלומי יין

²ב הנה חזק ואמץ לאדני כזרם ברד שער קטב כזרם מים כבירים שטפים הניח לארץ--ביד

³ג ברגלים תרמסנה עטרת גאות שכורי אפרים

⁴ד והיתה ציצת נבל צבי תפארתו אשר על ראש גיא שמנים--כבכורה בטרם קיץ אשר יראה הראה אותה בעודה בכפו יבלענה {ס}

⁵ה ביום ההוא יהיה יהוה צבאות לעטרת צבי ולצפירת תפארה--לשאר עמו

⁶ו ולרוח משפט--ליושב על המשפט ולגבורה משיבי מלחמה שערה {ס}

⁷ז וגם אלה ביין שגו ובשכר תעו כהן ונביא שגו בשכר נבלעו מן היין תעו מן השכר שגו בראה פקו פליליה

⁸ח כי כל שלחנות מלאו קיא צאה בלי מקום {פ}

⁹ט את מי יורה דעה ואת מי יבין שמועה--גמולי מחלב עתיקי משדים

¹⁰י כי צו לצו צו לצו קו לקו קו לקו--זעיר שם זעיר שם

¹¹יא כי בלעגי שפה ובלשון אחרת ידבר אל העם הזה

¹²יב אשר אמר אליהם זאת המנוחה הניחו לעיף וזאת המרגעה ולא אבוא שמוע

¹³יג והיה להם דבר יהוה צו לצו צו לצו קו לקו קו לקו זעיר שם זעיר שם--למען ילכו וכשלו אחור ונשברו ונוקשו ונלכדו {פ}

¹⁴יד לכן שמעו דבר יהוה אנשי לצון--משלי העם הזה אשר בירושלם

¹⁵טו כי אמרתם כרתנו ברית את מות ועם שאול עשינו חזה שיט (שוט) שוטף כי עבר (יעבר) לא יבואנו כי שמנו כזב מחסנו ובשקר נסתרנו {פ}

¹⁶טז לכן כה אמר אדני יהוה הנני יסד בציון אבן אבן בחן פנת יקרת מוסד מוסד--המאמין לא יחיש

¹⁷יז ושמתי משפט לקו וצדקה למשקלת ויעה ברד מחסה כזב וסתר מים ישטפו {ס}

¹⁸יח וכפר בריתכם את מות וחזותכם את שאול לא תקום שוט שוטף כי יעבר והייתם לו למרמס

¹⁹יט מדי עברו יקח אתכם כי בבקר בבקר יעבר ביום ובלילה והיה רק זועה הבין שמועה

²⁰כ כי קצר המצע מהשתרע והמסכה צרה כהתכנס

²¹כא כי כהר פרצים יקום יהוה כעמק בגבעון ירגז--לעשות מעשהו זר מעשהו ולעבד עבדתו נכריה עבדתו

²²כב ועתה אל תתלוצצו פן יחזקו מוסריכם כי כלה ונחרצה שמעתי מאת אדני יהוה צבאות--על כל הארץ {פ}

²³כג האזינו ושמעו קולי הקשיבו ושמעו אמרתי

²⁴כד הכל היום יחרש החרש לזרע יפתח וישדד אדמתו

²⁵כה הלוא אם שוה פניה והפיץ קצח וכמן יזרק ושם חטה שורה ושערה נסמן וכסמת גבלתו

²⁶כו ויסרו למשפט אלהיו יורנו

²⁷כז כי לא בחרוץ יודש קצח ואופן עגלה על כמן יוסב כי במטה יחבט קצח וכמן בשבט

²⁸כח לחם יודק כי לא לנצח אדוש ידושנו והמם גלגל עגלתו ופרשיו לא ידקנו

²⁹כט גם זאת מעם יהוה צבאות יצאה הפלא עצה הגדיל תושיה {פ}