Read כֶּתֶר אֲרָם צוֹבָא - Tanah Aleppo Codex ישעיהו 29 Bible Online

ישעיהו 29 - כֶּתֶר אֲרָם צוֹבָא - Tanah Aleppo Codex bible

ישעיהו 29

¹א הוי אריאל אריאל קרית חנה דוד ספו שנה על שנה חגים ינקפו

²ב והציקותי לאריאל והיתה תאניה ואניה והיתה לי כאריאל

³ג וחניתי כדור עליך וצרתי עליך מצב והקימתי עליך מצרת

⁴ד ושפלת מארץ תדברי ומעפר תשח אמרתך והיה כאוב מארץ קולך ומעפר אמרתך תצפצף

⁵ה והיה כאבק דק המון זריך וכמץ עבר המון עריצים והיה לפתע פתאם

⁶ו מעם יהוה צבאות תפקד ברעם וברעש וקול גדול סופה וסערה ולהב אש אוכלה

⁷ז והיה כחלום חזון לילה המון כל הגוים הצבאים על אריאל וכל צביה ומצדתה והמציקים לה

⁸ח והיה כאשר יחלם הרעב והנה אוכל והקיץ וריקה נפשו וכאשר יחלם הצמא והנה שתה והקיץ והנה עיף ונפשו שוקקה--כן יהיה המון כל הגוים הצבאים על הר ציון {פ}

⁹ט התמהמהו ותמהו השתעשעו ושעו שכרו ולא יין נעו ולא שכר

¹⁰י כי נסך עליכם יהוה רוח תרדמה ויעצם את עיניכם את הנביאים ואת ראשיכם החזים כסה

¹¹יא ותהי לכם חזות הכל כדברי הספר החתום אשר יתנו אתו אל יודע הספר (ספר) לאמר קרא נא זה ואמר לא אוכל כי חתום הוא

¹²יב ונתן הספר על אשר לא ידע ספר לאמר--קרא נא זה ואמר לא ידעתי ספר {ס}

¹³יג ויאמר אדני יען כי נגש העם הזה בפיו ובשפתיו כבדוני ולבו רחק ממני--ותהי יראתם אתי מצות אנשים מלמדה

¹⁴יד לכן הנני יוסף להפליא את העם הזה--הפלא ופלא ואבדה חכמת חכמיו ובינת נבניו תסתתר {ס}

¹⁵טו הוי המעמיקים מיהוה לסתר עצה והיה במחשך מעשיהם ויאמרו מי ראנו ומי ידענו

¹⁶טז הפככם--אם כחמר היצר יחשב כי יאמר מעשה לעשהו לא עשני ויצר אמר ליצרו לא הבין

¹⁷יז הלוא עוד מעט מזער ושב לבנון לכרמל והכרמל ליער יחשב

¹⁸יח ושמעו ביום ההוא החרשים דברי ספר ומאפל ומחשך עיני עורים תראינה

¹⁹יט ויספו ענוים ביהוה שמחה ואביוני אדם בקדוש ישראל יגילו

²⁰כ כי אפס עריץ וכלה לץ ונכרתו כל שקדי און

²¹כא מחטיאי אדם בדבר ולמוכיח בשער יקשון ויטו בתהו צדיק {פ}

²²כב לכן כה אמר יהוה אל בית יעקב אשר פדה את אברהם לא עתה יבוש יעקב ולא עתה פניו יחורו

²³כג כי בראתו ילדיו מעשה ידי בקרבו--יקדישו שמי והקדישו את קדוש יעקב ואת אלהי ישראל יעריצו

²⁴כד וידעו תעי רוח בינה ורוגנים ילמדו לקח {ס}