Read כֶּתֶר אֲרָם צוֹבָא - Tanah Aleppo Codex ישעיהו 33 Bible Online

ישעיהו 33 - כֶּתֶר אֲרָם צוֹבָא - Tanah Aleppo Codex bible

ישעיהו 33

¹א הוי שודד ואתה לא שדוד ובוגד ולא בגדו בו כהתמך שודד תושד כנלתך לבגד יבגדו בך {ס}

²ב יהוה חננו לך קוינו היה זרעם לבקרים אף ישועתנו בעת צרה

³ג מקול המון נדדו עמים מרוממתך נפצו גוים

⁴ד ואסף שללכם אסף החסיל--כמשק גבים שקק בו

⁵ה נשגב יהוה כי שכן מרום מלא ציון משפט וצדקה

⁶ו והיה אמונת עתיך חסן ישועת חכמת ודעת יראת יהוה היא אוצרו {פ}

⁷ז הן אראלם צעקו חצה מלאכי שלום מר יבכיון

⁸ח נשמו מסלות שבת עבר ארח הפר ברית מאס ערים לא חשב אנוש

⁹ט אבל אמללה ארץ החפיר לבנון קמל היה השרון כערבה ונער בשן וכרמל {ס}

¹⁰י עתה אקום יאמר יהוה עתה ארומם--עתה אנשא

¹¹יא תהרו חשש תלדו קש רוחכם אש תאכלכם

¹²יב והיו עמים משרפות שיד קוצים כסוחים באש יצתו {פ}

¹³יג שמעו רחוקים אשר עשיתי ודעו קרובים גברתי

¹⁴יד פחדו בציון חטאים אחזה רעדה חנפים מי יגור לנו אש אוכלה--מי יגור לנו מוקדי עולם

¹⁵טו הלך צדקות ודבר מישרים מאס בבצע מעשקות נער כפיו מתמך בשחד אטם אזנו משמע דמים ועצם עיניו מראות ברע

¹⁶טז הוא מרומים ישכן מצדות סלעים משגבו לחמו נתן מימיו נאמנים

¹⁷יז מלך ביפיו תחזינה עיניך תראינה ארץ מרחקים

¹⁸יח לבך יהגה אימה איה ספר איה שקל איה ספר את המגדלים

¹⁹יט את עם נועז לא תראה עם עמקי שפה משמוע נלעג לשון אין בינה

²⁰כ חזה ציון קרית מועדנו עיניך תראינה ירושלם נוה שאנן אהל בל יצען בל יסע יתדתיו לנצח וכל חבליו בל ינתקו

²¹כא כי אם שם אדיר יהוה לנו מקום נהרים יארים רחבי ידים בל תלך בו אני שיט וצי אדיר לא יעברנו

²²כב כי יהוה שפטנו יהוה מחקקנו יהוה מלכנו הוא יושיענו

²³כג נטשו חבליך בל יחזקו כן תרנם בל פרשו נס אז חלק עד שלל מרבה פסחים בזזו בז

²⁴כד ובל יאמר שכן חליתי העם הישב בה נשא עון {ס}