Read כֶּתֶר אֲרָם צוֹבָא - Tanah Aleppo Codex ישעיהו 41 Bible Online

ישעיהו 41 - כֶּתֶר אֲרָם צוֹבָא - Tanah Aleppo Codex bible

ישעיהו 41

¹א החרישו אלי איים ולאמים יחליפו כח יגשו אז ידברו יחדו למשפט נקרבה

²ב מי העיר ממזרח צדק יקראהו לרגלו יתן לפניו גוים ומלכים ירד--יתן כעפר חרבו כקש נדף קשתו

³ג ירדפם יעבור שלום ארח ברגליו לא יבוא

⁴ד מי פעל ועשה קרא הדרות מראש אני יהוה ראשון ואת אחרנים אני הוא

⁵ה ראו איים ויראו קצות הארץ יחרדו קרבו ויאתיון

⁶ו איש את רעהו יעזרו ולאחיו יאמר חזק

⁷ז ויחזק חרש את צרף מחליק פטיש את הולם פעם אמר לדבק טוב הוא ויחזקהו במסמרים לא ימוט {ס}

⁸ח ואתה ישראל עבדי יעקב אשר בחרתיך זרע אברהם אהבי

⁹ט אשר החזקתיך מקצות הארץ ומאציליה קראתיך ואמר לך עבדי אתה בחרתיך ולא מאסתיך

¹⁰י אל תירא כי עמך אני אל תשתע כי אני אלהיך אמצתיך אף עזרתיך--אף תמכתיך בימין צדקי

¹¹יא הן יבשו ויכלמו כל הנחרים בך יהיו כאין ויאבדו אנשי ריבך

¹²יב תבקשם ולא תמצאם אנשי מצתך יהיו כאין וכאפס אנשי מלחמתך

¹³יג כי אני יהוה אלהיך--מחזיק ימינך האמר לך אל תירא אני עזרתיך {ס}

¹⁴יד אל תיראי תולעת יעקב מתי ישראל אני עזרתיך נאם יהוה וגאלך קדוש ישראל

¹⁵טו הנה שמתיך למורג חרוץ חדש--בעל פיפיות תדוש הרים ותדק וגבעות כמץ תשים

¹⁶טז תזרם ורוח תשאם וסערה תפיץ אותם ואתה תגיל ביהוה בקדוש ישראל תתהלל {ס}

¹⁷יז העניים והאביונים מבקשים מים ואין--לשונם בצמא נשתה אני יהוה אענם אלהי ישראל לא אעזבם

¹⁸יח אפתח על שפיים נהרות ובתוך בקעות מעינות אשים מדבר לאגם מים וארץ ציה למוצאי מים

¹⁹יט אתן במדבר ארז שטה והדס ועץ שמן אשים בערבה ברוש תדהר ותאשור--יחדו

²⁰כ למען יראו וידעו וישימו וישכילו יחדו--כי יד יהוה עשתה זאת וקדוש ישראל בראה {פ}

²¹כא קרבו ריבכם יאמר יהוה הגישו עצמותיכם יאמר מלך יעקב

²²כב יגישו ויגידו לנו את אשר תקרינה הראשנות מה הנה הגידו ונשימה לבנו ונדעה אחריתן או הבאות השמיענו

²³כג הגידו האתיות לאחור ונדעה כי אלהים אתם אף תיטיבו ותרעו ונשתעה ונרא (ונראה) יחדו

²⁴כד הן אתם מאין ופעלכם מאפע תועבה יבחר בכם {פ}

²⁵כה העירותי מצפון ויאת ממזרח שמש יקרא בשמי ויבא סגנים כמו חמר וכמו יוצר ירמס טיט

²⁶כו מי הגיד מראש ונדעה ומלפנים ונאמר צדיק אף אין מגיד אף אין משמיע--אף אין שמע אמריכם

²⁷כז ראשון לציון הנה הנם ולירושלם מבשר אתן

²⁸כח וארא ואין איש ומאלה ואין יועץ ואשאלם וישיבו דבר

²⁹כט הן כלם און אפס מעשיהם רוח ותהו נסכיהם {פ}