Read כֶּתֶר אֲרָם צוֹבָא - Tanah Aleppo Codex ישעיהו 42 Bible Online

ישעיהו 42 - כֶּתֶר אֲרָם צוֹבָא - Tanah Aleppo Codex bible

ישעיהו 42

¹א הן עבדי אתמך בו בחירי רצתה נפשי נתתי רוחי עליו משפט לגוים יוציא

²ב לא יצעק ולא ישא ולא ישמיע בחוץ קולו

³ג קנה רצוץ לא ישבור ופשתה כהה לא יכבנה לאמת יוציא משפט

⁴ד לא יכהה ולא ירוץ עד ישים בארץ משפט ולתורתו איים ייחלו {פ}

⁵ה כה אמר האל יהוה בורא השמים ונוטיהם רקע הארץ וצאצאיה נתן נשמה לעם עליה ורוח להלכים בה

⁶ו אני יהוה קראתיך בצדק ואחזק בידך ואצרך ואתנך לברית עם--לאור גוים

⁷ז לפקח עינים עורות להוציא ממסגר אסיר מבית כלא ישבי חשך

⁸ח אני יהוה הוא שמי וכבודי לאחר לא אתן ותהלתי לפסילים

⁹ט הראשנות הנה באו וחדשות אני מגיד בטרם תצמחנה אשמיע אתכם {פ}

¹⁰י שירו ליהוה שיר חדש תהלתו מקצה הארץ יורדי הים ומלאו איים וישביהם

¹¹יא ישאו מדבר ועריו חצרים תשב קדר ירנו ישבי סלע מראש הרים יצוחו

¹²יב ישימו ליהוה כבוד ותהלתו באיים יגידו

¹³יג יהוה כגבור יצא כאיש מלחמות יעיר קנאה יריע אף יצריח--על איביו יתגבר {ס}

¹⁴יד החשיתי מעולם--אחריש אתאפק כיולדה אפעה אשם ואשאף יחד

¹⁵טו אחריב הרים וגבעות וכל עשבם אוביש ושמתי נהרות לאיים ואגמים אוביש

¹⁶טז והולכתי עורים בדרך לא ידעו--בנתיבות לא ידעו אדריכם אשים מחשך לפניהם לאור ומעקשים למישור--אלה הדברים עשיתם ולא עזבתים

¹⁷יז נסגו אחור יבשו בשת הבטחים בפסל האמרים למסכה אתם אלהינו {פ}

¹⁸יח החרשים שמעו והעורים הביטו לראות

¹⁹יט מי עור כי אם עבדי וחרש כמלאכי אשלח מי עור כמשלם ועור כעבד יהוה

²⁰כ ראית (ראות) רבות ולא תשמר פקוח אזנים ולא ישמע

²¹כא יהוה חפץ למען צדקו יגדיל תורה ויאדיר

²²כב והוא עם בזוז ושסוי הפח בחורים כלם ובבתי כלאים החבאו היו לבז ואין מציל משסה ואין אמר השב

²³כג מי בכם יאזין זאת יקשב וישמע לאחור

²⁴כד מי נתן למשוסה (למשסה) יעקב וישראל לבזזים הלוא יהוה זו חטאנו לו ולא אבו בדרכיו הלוך ולא שמעו בתורתו

²⁵כה וישפך עליו חמה אפו ועזוז מלחמה ותלהטהו מסביב ולא ידע ותבער בו ולא ישים על לב