Read כֶּתֶר אֲרָם צוֹבָא - Tanah Aleppo Codex ישעיהו 43 Bible Online

ישעיהו 43 - כֶּתֶר אֲרָם צוֹבָא - Tanah Aleppo Codex bible

ישעיהו 43

¹א ועתה כה אמר יהוה בראך יעקב ויצרך ישראל אל תירא כי גאלתיך קראתי בשמך לי אתה

²ב כי תעבר במים אתך אני ובנהרות לא ישטפוך כי תלך במו אש לא תכוה ולהבה לא תבער בך

³ג כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך

⁴ד מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך

⁵ה אל תירא כי אתך אני ממזרח אביא זרעך וממערב אקבצך

⁶ו אמר לצפון תני ולתימן אל תכלאי הביאי בני מרחוק ובנותי מקצה הארץ

⁷ז כל הנקרא בשמי ולכבודי בראתיו יצרתיו אף עשיתיו

⁸ח הוציא עם עור ועינים יש וחרשים ואזנים למו

⁹ט כל הגוים נקבצו יחדו ויאספו לאמים--מי בהם יגיד זאת וראשנות ישמיענו יתנו עדיהם ויצדקו וישמעו ויאמרו אמת

¹⁰י אתם עדי נאם יהוה ועבדי אשר בחרתי למען תדעו ותאמינו לי ותבינו כי אני הוא--לפני לא נוצר אל ואחרי לא יהיה {ס}

¹¹יא אנכי אנכי יהוה ואין מבלעדי מושיע

¹²יב אנכי הגדתי והושעתי והשמעתי--ואין בכם זר ואתם עדי נאם יהוה ואני אל

¹³יג גם מיום אני הוא ואין מידי מציל אפעל ומי ישיבנה {ס}

¹⁴יד כה אמר יהוה גאלכם קדוש ישראל למענכם שלחתי בבלה והורדתי בריחים כלם וכשדים באניות רנתם

¹⁵טו אני יהוה קדושכם בורא ישראל מלככם {ס}

¹⁶טז כה אמר יהוה הנותן בים דרך ובמים עזים נתיבה

¹⁷יז המוציא רכב וסוס חיל ועזוז יחדו ישכבו בל יקומו דעכו כפשתה כבו

¹⁸יח אל תזכרו ראשנות וקדמניות אל תתבננו

¹⁹יט הנני עשה חדשה עתה תצמח הלוא תדעוה אף אשים במדבר דרך בישמון נהרות

²⁰כ תכבדני חית השדה תנים ובנות יענה כי נתתי במדבר מים נהרות בישימן להשקות עמי בחירי

²¹כא עם זו יצרתי לי תהלתי יספרו {ס}

²²כב ולא אתי קראת יעקב כי יגעת בי ישראל

²³כג לא הביאת לי שה עלתיך וזבחיך לא כבדתני לא העבדתיך במנחה ולא הוגעתיך בלבונה

²⁴כד לא קנית לי בכסף קנה וחלב זבחיך לא הרויתני אך העבדתני בחטאותיך הוגעתני בעונתיך

²⁵כה אנכי אנכי הוא מחה פשעיך למעני וחטאתיך לא אזכר

²⁶כו הזכירני נשפטה יחד ספר אתה למען תצדק

²⁷כז אביך הראשון חטא ומליציך פשעו בי

²⁸כח ואחלל שרי קדש ואתנה לחרם יעקב וישראל לגדופים {פ}