Read כֶּתֶר אֲרָם צוֹבָא - Tanah Aleppo Codex ישעיהו 45 Bible Online

ישעיהו 45 - כֶּתֶר אֲרָם צוֹבָא - Tanah Aleppo Codex bible

ישעיהו 45

¹א כה אמר יהוה למשיחו לכורש אשר החזקתי בימינו לרד לפניו גוים ומתני מלכים אפתח--לפתח לפניו דלתים ושערים לא יסגרו

²ב אני לפניך אלך והדורים אושר (אישר) דלתות נחושה אשבר ובריחי ברזל אגדע

³ג ונתתי לך אוצרות חשך ומטמני מסתרים למען תדע כי אני יהוה הקורא בשמך--אלהי ישראל

⁴ד למען עבדי יעקב וישראל בחירי ואקרא לך בשמך אכנך ולא ידעתני

⁵ה אני יהוה ואין עוד זולתי אין אלהים אאזרך ולא ידעתני

⁶ו למען ידעו ממזרח שמש וממערבה כי אפס בלעדי אני יהוה ואין עוד

⁷ז יוצר אור ובורא חשך עשה שלום ובורא רע אני יהוה עשה כל אלה {פ}

⁸ח הרעיפו שמים ממעל ושחקים יזלו צדק תפתח ארץ ויפרו ישע וצדקה תצמיח יחד--אני יהוה בראתיו {ס}

⁹ט הוי רב את יצרו--חרש את חרשי אדמה היאמר חמר ליצרו מה תעשה ופעלך אין ידים לו {ס}

¹⁰י הוי אמר לאב מה תוליד ולאשה מה תחילין {ס}

¹¹יא כה אמר יהוה קדוש ישראל ויצרו האתיות שאלוני על בני ועל פעל ידי תצוני

¹²יב אנכי עשיתי ארץ ואדם עליה בראתי אני ידי נטו שמים וכל צבאם צויתי

¹³יג אנכי העירתהו בצדק וכל דרכיו אישר הוא יבנה עירי וגלותי ישלח--לא במחיר ולא בשחד אמר יהוה צבאות {ס}

¹⁴יד כה אמר יהוה יגיע מצרים וסחר כוש וסבאים אנשי מדה עליך יעברו ולך יהיו אחריך ילכו בזקים יעברו ואליך ישתחוו אליך יתפללו אך בך אל ואין עוד אפס אלהים

¹⁵טו אכן אתה אל מסתתר--אלהי ישראל מושיע

¹⁶טז בושו וגם נכלמו כלם יחדו הלכו בכלמה חרשי צירים

¹⁷יז ישראל נושע ביהוה תשועת עולמים לא תבשו ולא תכלמו עד עולמי עד {פ}

¹⁸יח כי כה אמר יהוה בורא השמים הוא האלהים יצר הארץ ועשה הוא כוננה--לא תהו בראה לשבת יצרה אני יהוה ואין עוד

¹⁹יט לא בסתר דברתי במקום ארץ חשך--לא אמרתי לזרע יעקב תהו בקשוני אני יהוה דבר צדק מגיד מישרים

²⁰כ הקבצו ובאו התנגשו יחדו פליטי הגוים לא ידעו הנשאים את עץ פסלם ומתפללים אל אל לא יושיע

²¹כא הגידו והגישו אף יועצו יחדו מי השמיע זאת מקדם מאז הגידה הלוא אני יהוה ואין עוד אלהים מבלעדי--אל צדיק ומושיע אין זולתי

²²כב פנו אלי והושעו כל אפסי ארץ כי אני אל ואין עוד

²³כג בי נשבעתי--יצא מפי צדקה דבר ולא ישוב כי לי תכרע כל ברך תשבע כל לשון

²⁴כד אך ביהוה לי אמר צדקות ועז עדיו יבוא ויבשו כל הנחרים בו

²⁵כה ביהוה יצדקו ויתהללו כל זרע ישראל