Read כֶּתֶר אֲרָם צוֹבָא - Tanah Aleppo Codex ישעיהו 46 Bible Online

ישעיהו 46 - כֶּתֶר אֲרָם צוֹבָא - Tanah Aleppo Codex bible

ישעיהו 46

¹א כרע בל קרס נבו--היו עצביהם לחיה ולבהמה נשאתיכם עמוסות משא לעיפה

²ב קרסו כרעו יחדו לא יכלו מלט משא ונפשם בשבי הלכה {פ}

³ג שמעו אלי בית יעקב וכל שארית בית ישראל--העמסים מני בטן הנשאים מני רחם

⁴ד ועד זקנה אני הוא ועד שיבה אני אסבל אני עשיתי ואני אשא ואני אסבל ואמלט {ס}

⁵ה למי תדמיוני ותשוו ותמשלוני ונדמה

⁶ו הזלים זהב מכיס וכסף בקנה ישקלו ישכרו צורף ויעשהו אל יסגדו אף ישתחוו

⁷ז ישאהו על כתף יסבלהו ויניחהו תחתיו ויעמד--ממקומו לא ימיש אף יצעק אליו ולא יענה מצרתו לא יושיענו {ס}

⁸ח זכרו זאת והתאששו השיבו פושעים על לב

⁹ט זכרו ראשנות מעולם כי אנכי אל ואין עוד אלהים ואפס כמוני

¹⁰י מגיד מראשית אחרית ומקדם אשר לא נעשו אמר עצתי תקום וכל חפצי אעשה

¹¹יא קרא ממזרח עיט מארץ מרחק איש עצתו (עצתי) אף דברתי אף אביאנה--יצרתי אף אעשנה {ס}

¹²יב שמעו אלי אבירי לב--הרחוקים מצדקה

¹³יג קרבתי צדקתי לא תרחק ותשועתי לא תאחר ונתתי בציון תשועה לישראל תפארתי {ס}