Read כֶּתֶר אֲרָם צוֹבָא - Tanah Aleppo Codex ישעיהו 5 Bible Online

ישעיהו 5 - כֶּתֶר אֲרָם צוֹבָא - Tanah Aleppo Codex bible

ישעיהו 5

¹א אשירה נא לידידי שירת דודי לכרמו כרם היה לידידי בקרן בן שמן

²ב ויעזקהו ויסקלהו ויטעהו שרק ויבן מגדל בתוכו וגם יקב חצב בו ויקו לעשות ענבים ויעש באשים

³ג ועתה יושב ירושלם ואיש יהודה--שפטו נא ביני ובין כרמי

⁴ד מה לעשות עוד לכרמי ולא עשיתי בו מדוע קויתי לעשות ענבים ויעש באשים

⁵ה ועתה אודיעה נא אתכם את אשר אני עשה לכרמי הסר משוכתו והיה לבער פרץ גדרו והיה למרמס

⁶ו ואשיתהו בתה לא יזמר ולא יעדר ועלה שמיר ושית ועל העבים אצוה מהמטיר עליו מטר

⁷ז כי כרם יהוה צבאות בית ישראל ואיש יהודה נטע שעשועיו ויקו למשפט והנה משפח לצדקה והנה צעקה {פ}

⁸ח הוי מגיעי בית בבית--שדה בשדה יקריבו עד אפס מקום והושבתם לבדכם בקרב הארץ

⁹ט באזני יהוה צבאות אם לא בתים רבים לשמה יהיו--גדלים וטובים מאין יושב

¹⁰י כי עשרת צמדי כרם יעשו בת אחת וזרע חמר יעשה איפה {ס}

¹¹יא הוי משכימי בבקר שכר ירדפו מאחרי בנשף יין ידליקם

¹²יב והיה כנור ונבל תף וחליל ויין--משתיהם ואת פעל יהוה לא יביטו ומעשה ידיו לא ראו

¹³יג לכן גלה עמי מבלי דעת וכבודו מתי רעב והמונו צחה צמא

¹⁴יד לכן הרחיבה שאול נפשה ופערה פיה לבלי חק וירד הדרה והמונה ושאונה ועלז בה

¹⁵טו וישח אדם וישפל איש ועיני גבהים תשפלנה

¹⁶טז ויגבה יהוה צבאות במשפט והאל הקדוש נקדש בצדקה

¹⁷יז ורעו כבשים כדברם וחרבות מחים גרים יאכלו {ס}

¹⁸יח הוי משכי העון בחבלי השוא וכעבות העגלה חטאה

¹⁹יט האמרים ימהר יחישה מעשהו--למען נראה ותקרב ותבואה עצת קדוש ישראל--ונדעה {פ}

²⁰כ הוי האמרים לרע טוב ולטוב רע שמים חשך לאור ואור לחשך שמים מר למתוק ומתוק למר {ס}

²¹כא הוי חכמים בעיניהם ונגד פניהם נבנים {ס}

²²כב הוי גבורים לשתות יין ואנשי חיל למסך שכר

²³כג מצדיקי רשע עקב שחד וצדקת צדיקים יסירו ממנו {פ}

²⁴כד לכן כאכל קש לשון אש וחשש להבה ירפה שרשם כמק יהיה ופרחם כאבק יעלה כי מאסו את תורת יהוה צבאות ואת אמרת קדוש ישראל נאצו

²⁵כה על כן חרה אף יהוה בעמו ויט ידו עליו ויכהו וירגזו ההרים ותהי נבלתם כסוחה בקרב חוצות בכל זאת לא שב אפו ועוד ידו נטויה

²⁶כו ונשא נס לגוים מרחוק ושרק לו מקצה הארץ והנה מהרה קל יבוא

²⁷כז אין עיף ואין כושל בו לא ינום ולא יישן ולא נפתח אזור חלציו ולא נתק שרוך נעליו

²⁸כח אשר חציו שנונים וכל קשתתיו דרכות פרסות סוסיו כצר נחשבו וגלגליו כסופה

²⁹כט שאגה לו כלביא ושאג (ישאג) ככפירים וינהם ויאחז טרף ויפליט ואין מציל

³⁰ל וינהם עליו ביום ההוא כנהמת ים ונבט לארץ והנה חשך צר ואור חשך בעריפיה {פ}