Read כֶּתֶר אֲרָם צוֹבָא - Tanah Aleppo Codex ישעיהו 52 Bible Online

ישעיהו 52 - כֶּתֶר אֲרָם צוֹבָא - Tanah Aleppo Codex bible

ישעיהו 52

¹א עורי עורי לבשי עזך ציון לבשי בגדי תפארתך ירושלם עיר הקדש--כי לא יוסיף יבא בך עוד ערל וטמא

²ב התנערי מעפר קומי שבי ירושלם התפתחו (התפתחי) מוסרי צוארך שביה בת ציון {ס}

³ג כי כה אמר יהוה חנם נמכרתם ולא בכסף תגאלו {ס}

⁴ד כי כה אמר אדני יהוה מצרים ירד עמי בראשנה לגור שם ואשור באפס עשקו

⁵ה ועתה מה לי פה נאם יהוה כי לקח עמי חנם משלו יהילילו נאם יהוה ותמיד כל היום שמי מנאץ

⁶ו לכן ידע עמי שמי לכן ביום ההוא כי אני הוא המדבר הנני {ס}

⁷ז מה נאוו על ההרים רגלי מבשר משמיע שלום מבשר טוב--משמיע ישועה אמר לציון מלך אלהיך

⁸ח קול צפיך נשאו קול יחדו ירננו כי עין בעין יראו בשוב יהוה ציון

⁹ט פצחו רננו יחדו חרבות ירושלם כי נחם יהוה עמו גאל ירושלם

¹⁰י חשף יהוה את זרוע קדשו לעיני כל הגוים וראו כל אפסי ארץ את ישועת אלהינו {ס}

¹¹יא סורו סורו צאו משם טמא אל תגעו צאו מתוכה--הברו נשאי כלי יהוה

¹²יב כי לא בחפזון תצאו ובמנוסה לא תלכון כי הלך לפניכם יהוה ומאספכם אלהי ישראל {ס}

¹³יג הנה ישכיל עבדי ירום ונשא וגבה מאד

¹⁴יד כאשר שממו עליך רבים כן משחת מאיש מראהו ותארו מבני אדם

¹⁵טו כן יזה גוים רבים עליו יקפצו מלכים פיהם כי אשר לא ספר להם ראו ואשר לא שמעו התבוננו {ס}