Read כֶּתֶר אֲרָם צוֹבָא - Tanah Aleppo Codex ישעיהו 56 Bible Online

ישעיהו 56 - כֶּתֶר אֲרָם צוֹבָא - Tanah Aleppo Codex bible

ישעיהו 56

¹א כה אמר יהוה שמרו משפט ועשו צדקה כי קרובה ישועתי לבוא וצדקתי להגלות

²ב אשרי אנוש יעשה זאת ובן אדם יחזיק בה--שמר שבת מחללו ושמר ידו מעשות כל רע {ס}

³ג ואל יאמר בן הנכר הנלוה אל יהוה לאמר הבדל יבדילני יהוה מעל עמו ואל יאמר הסריס הן אני עץ יבש {פ}

⁴ד כי כה אמר יהוה לסריסים אשר ישמרו את שבתותי ובחרו באשר חפצתי ומחזיקים בבריתי

⁵ה ונתתי להם בביתי ובחומתי יד ושם--טוב מבנים ומבנות שם עולם אתן לו אשר לא יכרת {ס}

⁶ו ובני הנכר הנלוים על יהוה לשרתו ולאהבה את שם יהוה להיות לו לעבדים--כל שמר שבת מחללו ומחזיקים בבריתי

⁷ז והביאותים אל הר קדשי ושמחתים בבית תפלתי--עולתיהם וזבחיהם לרצון על מזבחי כי ביתי בית תפלה יקרא לכל העמים

⁸ח נאם אדני יהוה מקבץ נדחי ישראל עוד אקבץ עליו לנקבציו

⁹ט כל חיתו שדי אתיו לאכל כל חיתו ביער {פ}

¹⁰י צפו עורים כלם לא ידעו--כלם כלבים אלמים לא יוכלו לנבח הזים שכבים אהבי לנום

¹¹יא והכלבים עזי נפש לא ידעו שבעה והמה רעים לא ידעו הבין כלם לדרכם פנו איש לבצעו מקצהו

¹²יב אתיו אקחה יין ונסבאה שכר והיה כזה יום מחר גדול יתר מאד