Read כֶּתֶר אֲרָם צוֹבָא - Tanah Aleppo Codex ישעיהו 6 Bible Online

ישעיהו 6 - כֶּתֶר אֲרָם צוֹבָא - Tanah Aleppo Codex bible

ישעיהו 6

¹א בשנת מות המלך עזיהו ואראה את אדני ישב על כסא רם ונשא ושוליו מלאים את ההיכל

²ב שרפים עמדים ממעל לו שש כנפים שש כנפים לאחד בשתים יכסה פניו ובשתים יכסה רגליו--ובשתים יעופף

³ג וקרא זה אל זה ואמר קדוש קדוש קדוש יהוה צבאות מלא כל הארץ כבודו

⁴ד וינעו אמות הספים מקול הקורא והבית ימלא עשן

⁵ה ואמר אוי לי כי נדמיתי כי איש טמא שפתים אנכי ובתוך עם טמא שפתים אנכי יושב כי את המלך יהוה צבאות--ראו עיני

⁶ו ויעף אלי אחד מן השרפים ובידו רצפה במלקחים--לקח מעל המזבח

⁷ז ויגע על פי--ויאמר הנה נגע זה על שפתיך וסר עונך וחטאתך תכפר

⁸ח ואשמע את קול אדני אמר את מי אשלח ומי ילך לנו ואמר הנני שלחני

⁹ט ויאמר לך ואמרת לעם הזה שמעו שמוע ואל תבינו וראו ראו ואל תדעו

¹⁰י השמן לב העם הזה ואזניו הכבד ועיניו השע פן יראה בעיניו ובאזניו ישמע ולבבו יבין ושב--ורפא לו

¹¹יא ואמר עד מתי אדני ויאמר עד אשר אם שאו ערים מאין יושב ובתים מאין אדם והאדמה תשאה שממה

¹²יב ורחק יהוה את האדם ורבה העזובה בקרב הארץ

¹³יג ועוד בה עשריה ושבה והיתה לבער כאלה וכאלון אשר בשלכת מצבת בם--זרע קדש מצבתה {פ}