Read כֶּתֶר אֲרָם צוֹבָא - Tanah Aleppo Codex ישעיהו 63 Bible Online

ישעיהו 63 - כֶּתֶר אֲרָם צוֹבָא - Tanah Aleppo Codex bible

ישעיהו 63

¹א מי זה בא מאדום חמוץ בגדים מבצרה זה הדור בלבושו צעה ברב כחו אני מדבר בצדקה רב להושיע

²ב מדוע אדם ללבושך ובגדיך כדרך בגת

³ג פורה דרכתי לבדי ומעמים אין איש אתי ואדרכם באפי וארמסם בחמתי ויז נצחם על בגדי וכל מלבושי אגאלתי

⁴ד כי יום נקם בלבי ושנת גאולי באה

⁵ה ואביט ואין עזר ואשתומם ואין סומך ותושע לי זרעי וחמתי היא סמכתני

⁶ו ואבוס עמים באפי ואשכרם בחמתי ואוריד לארץ נצחם {ס}

⁷ז חסדי יהוה אזכיר תהלת יהוה כעל כל אשר גמלנו יהוה ורב טוב לבית ישראל אשר גמלם כרחמיו וכרב חסדיו

⁸ח ויאמר אך עמי המה בנים לא ישקרו ויהי להם למושיע

⁹ט בכל צרתם לא (לו) צר ומלאך פניו הושיעם--באהבתו ובחמלתו הוא גאלם וינטלם וינשאם כל ימי עולם

¹⁰י והמה מרו ועצבו את רוח קדשו ויהפך להם לאויב הוא נלחם בם

¹¹יא ויזכר ימי עולם משה עמו איה המעלם מים את רעי צאנו--איה השם בקרבו את רוח קדשו

¹²יב מוליך לימין משה זרוע תפארתו בוקע מים מפניהם לעשות לו שם עולם

¹³יג מוליכם בתהמות כסוס במדבר לא יכשלו

¹⁴יד כבהמה בבקעה תרד רוח יהוה תניחנו--כן נהגת עמך לעשות לך שם תפארת

¹⁵טו הבט משמים וראה מזבל קדשך ותפארתך איה קנאתך וגבורתך המון מעיך ורחמיך אלי התאפקו

¹⁶טז כי אתה אבינו--כי אברהם לא ידענו וישראל לא יכירנו אתה יהוה אבינו גאלנו מעולם שמך

¹⁷יז למה תתענו יהוה מדרכיך תקשיח לבנו מיראתך שוב למען עבדיך שבטי נחלתך

¹⁸יח למצער ירשו עם קדשך צרינו בוססו מקדשך

¹⁹יט היינו מעולם לא משלת בם--לא נקרא שמך עליהם לוא קרעת שמים ירדת מפניך הרים נזלו