Read כֶּתֶר אֲרָם צוֹבָא - Tanah Aleppo Codex ישעיהו 64 Bible Online

ישעיהו 64 - כֶּתֶר אֲרָם צוֹבָא - Tanah Aleppo Codex bible

ישעיהו 64

¹א כקדח אש המסים מים תבעה אש להודיע שמך לצריך מפניך גוים ירגזו

²ב בעשותך נוראות לא נקוה ירדת מפניך הרים נזלו {ס}

³ג ומעולם לא שמעו לא האזינו עין לא ראתה אלהים זולתך--יעשה למחכה לו

⁴ד פגעת את שש ועשה צדק בדרכיך יזכרוך הן אתה קצפת ונחטא בהם עולם ונושע

⁵ה ונהי כטמא כלנו וכבגד עדים כל צדקתינו ונבל כעלה כלנו ועוננו כרוח ישאנו

⁶ו ואין קורא בשמך מתעורר להחזיק בך כי הסתרת פניך ממנו ותמוגנו ביד עוננו

⁷ז ועתה יהוה אבינו אתה אנחנו החמר ואתה יצרנו ומעשה ידך כלנו

⁸ח אל תקצף יהוה עד מאד ואל לעד תזכר עון הן הבט נא עמך כלנו

⁹ט ערי קדשך היו מדבר ציון מדבר היתה ירושלם שממה

¹⁰י בית קדשנו ותפארתנו אשר הללוך אבתינו--היה לשרפת אש וכל מחמדינו היה לחרבה

¹¹יא העל אלה תתאפק יהוה תחשה ותעננו עד מאד {פ}