Read כֶּתֶר אֲרָם צוֹבָא - Tanah Aleppo Codex ישעיהו 8 Bible Online

ישעיהו 8 - כֶּתֶר אֲרָם צוֹבָא - Tanah Aleppo Codex bible

ישעיהו 8

¹א ויאמר יהוה אלי קח לך גליון גדול וכתב עליו בחרט אנוש למהר שלל חש בז

²ב ואעידה לי עדים נאמנים--את אוריה הכהן ואת זכריהו בן יברכיהו

³ג ואקרב אל הנביאה ותהר ותלד בן {ס} ויאמר יהוה אלי קרא שמו מהר שלל חש בז

⁴ד כי בטרם ידע הנער קרא אבי ואמי--ישא את חיל דמשק ואת שלל שמרון לפני מלך אשור {ס}

⁵ה ויסף יהוה דבר אלי עוד לאמר

⁶ו יען כי מאס העם הזה את מי השלח ההלכים לאט ומשוש את רצין ובן רמליהו

⁷ז ולכן הנה אדני מעלה עליהם את מי הנהר העצומים והרבים--את מלך אשור ואת כל כבודו ועלה על כל אפיקיו והלך על כל גדותיו

⁸ח וחלף ביהודה שטף ועבר עד צואר יגיע והיה מטות כנפיו מלא רחב ארצך עמנו אל {ס}

⁹ט רעו עמים וחתו והאזינו כל מרחקי ארץ התאזרו וחתו התאזרו וחתו

¹⁰י עצו עצה ותפר דברו דבר ולא יקום כי עמנו אל {ס}

¹¹יא כי כה אמר יהוה אלי כחזקת היד ויסרני מלכת בדרך העם הזה לאמר

¹²יב לא תאמרון קשר לכל אשר יאמר העם הזה קשר ואת מוראו לא תיראו ולא תעריצו

¹³יג את יהוה צבאות אתו תקדישו והוא מוראכם והוא מערצכם

¹⁴יד והיה למקדש ולאבן נגף ולצור מכשול לשני בתי ישראל לפח ולמוקש--ליושב ירושלם

¹⁵טו וכשלו בם רבים ונפלו ונשברו ונוקשו ונלכדו {פ}

¹⁶טז צור תעודה חתום תורה בלמדי

¹⁷יז וחכיתי ליהוה המסתיר פניו מבית יעקב וקויתי לו

¹⁸יח הנה אנכי והילדים אשר נתן לי יהוה לאתות ולמופתים בישראל--מעם יהוה צבאות השכן בהר ציון {ס}

¹⁹יט וכי יאמרו אליכם דרשו אל האבות ואל הידענים המצפצפים והמהגים הלוא עם אל אלהיו ידרש בעד החיים אל המתים

²⁰כ לתורה ולתעודה אם לא יאמרו כדבר הזה אשר אין לו שחר

²¹כא ועבר בה נקשה ורעב והיה כי ירעב והתקצף וקלל במלכו ובאלהיו--ופנה למעלה

²²כב ואל ארץ יביט והנה צרה וחשכה מעוף צוקה ואפלה מנדח [ (Isaiah 8:23) כג כי לא מועף לאשר מוצק לה כעת הראשון הקל ארצה זבלון וארצה נפתלי והאחרון הכביד--דרך הים עבר הירדן גליל הגוים ]