Read כֶּתֶר אֲרָם צוֹבָא - Tanah Aleppo Codex ויקרא 11 Bible Online

ויקרא 11 - כֶּתֶר אֲרָם צוֹבָא - Tanah Aleppo Codex bible

ויקרא 11

¹א וידבר יהוה אל משה ואל אהרן לאמר אלהם

²ב דברו אל בני ישראל לאמר זאת החיה אשר תאכלו מכל הבהמה אשר על הארץ

³ג כל מפרסת פרסה ושסעת שסע פרסת מעלת גרה בבהמה--אתה תאכלו

⁴ד אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס--טמא הוא לכם

⁵ה ואת השפן כי מעלה גרה הוא ופרסה לא יפריס טמא הוא לכם

⁶ו ואת הארנבת כי מעלת גרה הוא ופרסה לא הפריסה טמאה הוא לכם

⁷ז ואת החזיר כי מפריס פרסה הוא ושסע שסע פרסה והוא גרה לא יגר טמא הוא לכם

⁸ח מבשרם לא תאכלו ובנבלתם לא תגעו טמאים הם לכם

⁹ט את זה תאכלו מכל אשר במים כל אשר לו סנפיר וקשקשת במים בימים ובנחלים--אתם תאכלו

¹⁰י וכל אשר אין לו סנפיר וקשקשת בימים ובנחלים מכל שרץ המים ומכל נפש החיה אשר במים--שקץ הם לכם

¹¹יא ושקץ יהיו לכם מבשרם לא תאכלו ואת נבלתם תשקצו

¹²יב כל אשר אין לו סנפיר וקשקשת במים--שקץ הוא לכם

¹³יג ואת אלה תשקצו מן העוף לא יאכלו שקץ הם את הנשר ואת הפרס ואת העזניה

¹⁴יד ואת הדאה--ואת האיה למינה

¹⁵טו את כל ערב למינו

¹⁶טז ואת בת היענה ואת התחמס ואת השחף ואת הנץ למינהו

¹⁷יז ואת הכוס ואת השלך ואת הינשוף

¹⁸יח ואת התנשמת ואת הקאת ואת הרחם

¹⁹יט ואת החסידה האנפה למינה ואת הדוכיפת ואת העטלף

²⁰כ כל שרץ העוף ההלך על ארבע--שקץ הוא לכם

²¹כא אך את זה תאכלו מכל שרץ העוף ההלך על ארבע אשר לא (לו) כרעים ממעל לרגליו לנתר בהן על הארץ

²²כב את אלה מהם תאכלו--את הארבה למינו ואת הסלעם למינהו ואת החרגל למינהו ואת החגב למינהו

²³כג וכל שרץ העוף אשר לו ארבע רגלים--שקץ הוא לכם

²⁴כד ולאלה תטמאו כל הנגע בנבלתם יטמא עד הערב

²⁵כה וכל הנשא מנבלתם--יכבס בגדיו וטמא עד הערב

²⁶כו לכל הבהמה אשר הוא מפרסת פרסה ושסע איננה שסעת וגרה איננה מעלה--טמאים הם לכם כל הנגע בהם יטמא

²⁷כז וכל הולך על כפיו בכל החיה ההלכת על ארבע--טמאים הם לכם כל הנגע בנבלתם יטמא עד הערב

²⁸כח והנשא את נבלתם--יכבס בגדיו וטמא עד הערב טמאים המה לכם {ס}

²⁹כט וזה לכם הטמא בשרץ השרץ על הארץ החלד והעכבר והצב למינהו

³⁰ל והאנקה והכח והלטאה והחמט והתנשמת

³¹לא אלה הטמאים לכם בכל השרץ כל הנגע בהם במתם יטמא עד הערב

³²לב וכל אשר יפל עליו מהם במתם יטמא מכל כלי עץ או בגד או עור או שק כל כלי אשר יעשה מלאכה בהם במים יובא וטמא עד הערב וטהר

³³לג וכל כלי חרש--אשר יפל מהם אל תוכו כל אשר בתוכו יטמא ואתו תשברו

³⁴לד מכל האכל אשר יאכל אשר יבוא עליו מים--יטמא וכל משקה אשר ישתה בכל כלי יטמא

³⁵לה וכל אשר יפל מנבלתם עליו יטמא--תנור וכירים יתץ טמאים הם וטמאים יהיו לכם

³⁶לו אך מעין ובור מקוה מים יהיה טהור ונגע בנבלתם יטמא

³⁷לז וכי יפל מנבלתם על כל זרע זרוע אשר יזרע--טהור הוא

³⁸לח וכי יתן מים על זרע ונפל מנבלתם עליו--טמא הוא לכם {ס}

³⁹לט וכי ימות מן הבהמה אשר היא לכם לאכלה--הנגע בנבלתה יטמא עד הערב

⁴⁰מ והאכל מנבלתה--יכבס בגדיו וטמא עד הערב והנשא את נבלתה--יכבס בגדיו וטמא עד הערב

⁴¹מא וכל השרץ השרץ על הארץ--שקץ הוא לא יאכל

⁴²מב כל הולך על גחון וכל הולך על ארבע עד כל מרבה רגלים לכל השרץ השרץ על הארץ--לא תאכלום כי שקץ הם

⁴³מג אל תשקצו את נפשתיכם בכל השרץ השרץ ולא תטמאו בהם ונטמתם בם

⁴⁴מד כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ

⁴⁵מה כי אני יהוה המעלה אתכם מארץ מצרים להית לכם לאלהים והייתם קדשים כי קדוש אני

⁴⁶מו זאת תורת הבהמה והעוף וכל נפש החיה הרמשת במים ולכל נפש השרצת על הארץ

⁴⁷מז להבדיל בין הטמא ובין הטהר ובין החיה הנאכלת ובין החיה אשר לא תאכל {פ}