Read כֶּתֶר אֲרָם צוֹבָא - Tanah Aleppo Codex ויקרא 14 Bible Online

ויקרא 14 - כֶּתֶר אֲרָם צוֹבָא - Tanah Aleppo Codex bible

ויקרא 14

¹א וידבר יהוה אל משה לאמר

²ב זאת תהיה תורת המצרע ביום טהרתו והובא אל הכהן

³ג ויצא הכהן אל מחוץ למחנה וראה הכהן והנה נרפא נגע הצרעת מן הצרוע

⁴ד וצוה הכהן ולקח למטהר שתי צפרים חיות טהרות ועץ ארז ושני תולעת ואזב

⁵ה וצוה הכהן ושחט את הצפור האחת--אל כלי חרש על מים חיים

⁶ו את הצפר החיה יקח אתה ואת עץ הארז ואת שני התולעת ואת האזב וטבל אותם ואת הצפר החיה בדם הצפר השחטה על המים החיים

⁷ז והזה על המטהר מן הצרעת--שבע פעמים וטהרו ושלח את הצפר החיה על פני השדה

⁸ח וכבס המטהר את בגדיו וגלח את כל שערו ורחץ במים וטהר ואחר יבוא אל המחנה וישב מחוץ לאהלו שבעת ימים

⁹ט והיה ביום השביעי יגלח את כל שערו את ראשו ואת זקנו ואת גבת עיניו ואת כל שערו יגלח וכבס את בגדיו ורחץ את בשרו במים--וטהר

¹⁰י וביום השמיני יקח שני כבשים תמימם וכבשה אחת בת שנתה תמימה ושלשה עשרנים סלת מנחה בלולה בשמן ולג אחד שמן

¹¹יא והעמיד הכהן המטהר את האיש המטהר--ואתם לפני יהוה פתח אהל מועד

¹²יב ולקח הכהן את הכבש האחד והקריב אתו לאשם--ואת לג השמן והניף אתם תנופה לפני יהוה

¹³יג ושחט את הכבש במקום אשר ישחט את החטאת ואת העלה--במקום הקדש כי כחטאת האשם הוא לכהן--קדש קדשים הוא

¹⁴יד ולקח הכהן מדם האשם ונתן הכהן על תנוך אזן המטהר הימנית ועל בהן ידו הימנית ועל בהן רגלו הימנית

¹⁵טו ולקח הכהן מלג השמן ויצק על כף הכהן השמאלית

¹⁶טז וטבל הכהן את אצבעו הימנית מן השמן אשר על כפו השמאלית והזה מן השמן באצבעו שבע פעמים לפני יהוה

¹⁷יז ומיתר השמן אשר על כפו יתן הכהן על תנוך אזן המטהר הימנית ועל בהן ידו הימנית ועל בהן רגלו הימנית--על דם האשם

¹⁸יח והנותר בשמן אשר על כף הכהן יתן על ראש המטהר וכפר עליו הכהן לפני יהוה

¹⁹יט ועשה הכהן את החטאת וכפר על המטהר מטמאתו ואחר ישחט את העלה

²⁰כ והעלה הכהן את העלה ואת המנחה המזבחה וכפר עליו הכהן וטהר {ס}

²¹כא ואם דל הוא ואין ידו משגת--ולקח כבש אחד אשם לתנופה לכפר עליו ועשרון סלת אחד בלול בשמן למנחה--ולג שמן

²²כב ושתי תרים או שני בני יונה אשר תשיג ידו והיה אחד חטאת והאחד עלה

²³כג והביא אתם ביום השמיני לטהרתו--אל הכהן אל פתח אהל מועד לפני יהוה

²⁴כד ולקח הכהן את כבש האשם ואת לג השמן והניף אתם הכהן תנופה לפני יהוה

²⁵כה ושחט את כבש האשם ולקח הכהן מדם האשם ונתן על תנוך אזן המטהר הימנית ועל בהן ידו הימנית ועל בהן רגלו הימנית

²⁶כו ומן השמן יצק הכהן על כף הכהן השמאלית

²⁷כז והזה הכהן באצבעו הימנית מן השמן אשר על כפו השמאלית--שבע פעמים לפני יהוה

²⁸כח ונתן הכהן מן השמן אשר על כפו על תנוך אזן המטהר הימנית ועל בהן ידו הימנית ועל בהן רגלו הימנית--על מקום דם האשם

²⁹כט והנותר מן השמן אשר על כף הכהן יתן על ראש המטהר--לכפר עליו לפני יהוה

³⁰ל ועשה את האחד מן התרים או מן בני היונה מאשר תשיג ידו

³¹לא את אשר תשיג ידו את האחד חטאת ואת האחד עלה--על המנחה וכפר הכהן על המטהר לפני יהוה

³²לב זאת תורת אשר בו נגע צרעת אשר לא תשיג ידו בטהרתו {פ}

³³לג וידבר יהוה אל משה ואל אהרן לאמר

³⁴לד כי תבאו אל ארץ כנען אשר אני נתן לכם לאחזה ונתתי נגע צרעת בבית ארץ אחזתכם

³⁵לה ובא אשר לו הבית והגיד לכהן לאמר כנגע נראה לי בבית

³⁶לו וצוה הכהן ופנו את הבית בטרם יבא הכהן לראות את הנגע ולא יטמא כל אשר בבית ואחר כן יבא הכהן לראות את הבית

³⁷לז וראה את הנגע והנה הנגע בקירת הבית שקערורת ירקרקת או אדמדמת ומראיהן שפל מן הקיר

³⁸לח ויצא הכהן מן הבית אל פתח הבית והסגיר את הבית שבעת ימים

³⁹לט ושב הכהן ביום השביעי וראה והנה פשה הנגע בקירת הבית

⁴⁰מ וצוה הכהן וחלצו את האבנים אשר בהן הנגע והשליכו אתהן אל מחוץ לעיר אל מקום טמא

⁴¹מא ואת הבית יקצע מבית סביב ושפכו את העפר אשר הקצו אל מחוץ לעיר אל מקום טמא

⁴²מב ולקחו אבנים אחרות והביאו אל תחת האבנים ועפר אחר יקח וטח את הבית

⁴³מג ואם ישוב הנגע ופרח בבית אחר חלץ את האבנים ואחרי הקצות את הבית ואחרי הטוח

⁴⁴מד ובא הכהן וראה והנה פשה הנגע בבית--צרעת ממארת הוא בבית טמא הוא

⁴⁵מה ונתץ את הבית את אבניו ואת עציו ואת כל עפר הבית והוציא אל מחוץ לעיר אל מקום טמא

⁴⁶מו והבא אל הבית כל ימי הסגיר אתו--יטמא עד הערב

⁴⁷מז והשכב בבית יכבס את בגדיו והאכל בבית יכבס את בגדיו

⁴⁸מח ואם בא יבא הכהן וראה והנה לא פשה הנגע בבית אחרי הטח את הבית--וטהר הכהן את הבית כי נרפא הנגע

⁴⁹מט ולקח לחטא את הבית שתי צפרים ועץ ארז ושני תולעת ואזב

⁵⁰נ ושחט את הצפר האחת אל כלי חרש על מים חיים

⁵¹נא ולקח את עץ הארז ואת האזב ואת שני התולעת ואת הצפר החיה וטבל אתם בדם הצפר השחוטה ובמים החיים והזה אל הבית שבע פעמים

⁵²נב וחטא את הבית--בדם הצפור ובמים החיים ובצפר החיה ובעץ הארז ובאזב--ובשני התולעת

⁵³נג ושלח את הצפר החיה אל מחוץ לעיר--אל פני השדה וכפר על הבית וטהר

⁵⁴נד זאת התורה לכל נגע הצרעת ולנתק

⁵⁵נה ולצרעת הבגד ולבית

⁵⁶נו ולשאת ולספחת ולבהרת

⁵⁷נז להורת ביום הטמא וביום הטהר זאת תורת הצרעת {פ}