Read כֶּתֶר אֲרָם צוֹבָא - Tanah Aleppo Codex ויקרא 15 Bible Online

ויקרא 15 - כֶּתֶר אֲרָם צוֹבָא - Tanah Aleppo Codex bible

ויקרא 15

¹א וידבר יהוה אל משה ואל אהרן לאמר

²ב דברו אל בני ישראל ואמרתם אלהם איש איש כי יהיה זב מבשרו--זובו טמא הוא

³ג וזאת תהיה טמאתו בזובו רר בשרו את זובו או החתים בשרו מזובו--טמאתו הוא

⁴ד כל המשכב אשר ישכב עליו הזב--יטמא וכל הכלי אשר ישב עליו יטמא

⁵ה ואיש אשר יגע במשכבו--יכבס בגדיו ורחץ במים וטמא עד הערב

⁶ו והישב על הכלי אשר ישב עליו הזב--יכבס בגדיו ורחץ במים וטמא עד הערב

⁷ז והנגע בבשר הזב--יכבס בגדיו ורחץ במים וטמא עד הערב

⁸ח וכי ירק הזב בטהור--וכבס בגדיו ורחץ במים וטמא עד הערב

⁹ט וכל המרכב אשר ירכב עליו הזב--יטמא

¹⁰י וכל הנגע בכל אשר יהיה תחתיו--יטמא עד הערב והנושא אותם--יכבס בגדיו ורחץ במים וטמא עד הערב

¹¹יא וכל אשר יגע בו הזב וידיו לא שטף במים--וכבס בגדיו ורחץ במים וטמא עד הערב

¹²יב וכלי חרש אשר יגע בו הזב ישבר וכל כלי עץ--ישטף במים

¹³יג וכי יטהר הזב מזובו--וספר לו שבעת ימים לטהרתו וכבס בגדיו ורחץ בשרו במים חיים וטהר

¹⁴יד וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן

¹⁵טו ועשה אתם הכהן--אחד חטאת והאחד עלה וכפר עליו הכהן לפני יהוה מזובו {ס}

¹⁶טז ואיש כי תצא ממנו שכבת זרע--ורחץ במים את כל בשרו וטמא עד הערב

¹⁷יז וכל בגד וכל עור אשר יהיה עליו שכבת זרע--וכבס במים וטמא עד הערב

¹⁸יח ואשה אשר ישכב איש אתה שכבת זרע--ורחצו במים וטמאו עד הערב {פ}

¹⁹יט ואשה כי תהיה זבה דם יהיה זבה בבשרה--שבעת ימים תהיה בנדתה וכל הנגע בה יטמא עד הערב

²⁰כ וכל אשר תשכב עליו בנדתה יטמא וכל אשר תשב עליו יטמא

²¹כא וכל הנגע במשכבה--יכבס בגדיו ורחץ במים וטמא עד הערב

²²כב וכל הנגע--בכל כלי אשר תשב עליו יכבס בגדיו ורחץ במים וטמא עד הערב

²³כג ואם על המשכב הוא או על הכלי אשר הוא ישבת עליו--בנגעו בו יטמא עד הערב

²⁴כד ואם שכב ישכב איש אתה ותהי נדתה עליו--וטמא שבעת ימים וכל המשכב אשר ישכב עליו יטמא {ס}

²⁵כה ואשה כי יזוב זוב דמה ימים רבים בלא עת נדתה או כי תזוב על נדתה כל ימי זוב טמאתה כימי נדתה תהיה--טמאה הוא

²⁶כו כל המשכב אשר תשכב עליו כל ימי זובה--כמשכב נדתה יהיה לה וכל הכלי אשר תשב עליו--טמא יהיה כטמאת נדתה

²⁷כז וכל הנוגע בם יטמא וכבס בגדיו ורחץ במים וטמא עד הערב

²⁸כח ואם טהרה מזובה--וספרה לה שבעת ימים ואחר תטהר

²⁹כט וביום השמיני תקח לה שתי תרים או שני בני יונה והביאה אותם אל הכהן אל פתח אהל מועד

³⁰ל ועשה הכהן את האחד חטאת ואת האחד עלה וכפר עליה הכהן לפני יהוה מזוב טמאתה

³¹לא והזרתם את בני ישראל מטמאתם ולא ימתו בטמאתם בטמאם את משכני אשר בתוכם

³²לב זאת תורת הזב ואשר תצא ממנו שכבת זרע לטמאה בה

³³לג והדוה בנדתה והזב את זובו לזכר ולנקבה ולאיש אשר ישכב עם טמאה {פ}