Read כֶּתֶר אֲרָם צוֹבָא - Tanah Aleppo Codex ויקרא 18 Bible Online

ויקרא 18 - כֶּתֶר אֲרָם צוֹבָא - Tanah Aleppo Codex bible

ויקרא 18

¹א וידבר יהוה אל משה לאמר

²ב דבר אל בני ישראל ואמרת אלהם אני יהוה אלהיכם

³ג כמעשה ארץ מצרים אשר ישבתם בה לא תעשו וכמעשה ארץ כנען אשר אני מביא אתכם שמה לא תעשו ובחקתיהם לא תלכו

⁴ד את משפטי תעשו ואת חקתי תשמרו ללכת בהם אני יהוה אלהיכם

⁵ה ושמרתם את חקתי ואת משפטי אשר יעשה אתם האדם וחי בהם אני יהוה {ס}

⁶ו איש איש אל כל שאר בשרו לא תקרבו לגלות ערוה אני יהוה {ס}

⁷ז ערות אביך וערות אמך לא תגלה אמך הוא לא תגלה ערותה {ס}

⁸ח ערות אשת אביך לא תגלה ערות אביך הוא {ס}

⁹ט ערות אחותך בת אביך או בת אמך מולדת בית או מולדת חוץ--לא תגלה ערותן {ס}

¹⁰י ערות בת בנך או בת בתך לא תגלה ערותן כי ערותך הנה {ס}

¹¹יא ערות בת אשת אביך מולדת אביך אחותך הוא--לא תגלה ערותה {ס}

¹²יב ערות אחות אביך לא תגלה שאר אביך הוא {ס}

¹³יג ערות אחות אמך לא תגלה כי שאר אמך הוא {ס}

¹⁴יד ערות אחי אביך לא תגלה אל אשתו לא תקרב דדתך הוא {ס}

¹⁵טו ערות כלתך לא תגלה אשת בנך הוא לא תגלה ערותה {ס}

¹⁶טז ערות אשת אחיך לא תגלה ערות אחיך הוא {ס}

¹⁷יז ערות אשה ובתה לא תגלה את בת בנה ואת בת בתה לא תקח לגלות ערותה--שארה הנה זמה הוא

¹⁸יח ואשה אל אחתה לא תקח לצרר לגלות ערותה עליה--בחייה

¹⁹יט ואל אשה בנדת טמאתה--לא תקרב לגלות ערותה

²⁰כ ואל אשת עמיתך--לא תתן שכבתך לזרע לטמאה בה

²¹כא ומזרעך לא תתן להעביר למלך ולא תחלל את שם אלהיך אני יהוה

²²כב ואת זכר--לא תשכב משכבי אשה תועבה הוא

²³כג ובכל בהמה לא תתן שכבתך לטמאה בה ואשה לא תעמד לפני בהמה לרבעה--תבל הוא

²⁴כד אל תטמאו בכל אלה כי בכל אלה נטמאו הגוים אשר אני משלח מפניכם

²⁵כה ותטמא הארץ ואפקד עונה עליה ותקא הארץ את ישביה

²⁶כו ושמרתם אתם את חקתי ואת משפטי ולא תעשו מכל התועבת האלה האזרח והגר הגר בתוככם

²⁷כז כי את כל התועבת האל עשו אנשי הארץ אשר לפניכם ותטמא הארץ

²⁸כח ולא תקיא הארץ אתכם בטמאכם אתה כאשר קאה את הגוי אשר לפניכם

²⁹כט כי כל אשר יעשה מכל התועבת האלה--ונכרתו הנפשות העשת מקרב עמם

³⁰ל ושמרתם את משמרתי לבלתי עשות מחקות התועבת אשר נעשו לפניכם ולא תטמאו בהם אני יהוה אלהיכם {פ}