Read כֶּתֶר אֲרָם צוֹבָא - Tanah Aleppo Codex ויקרא 19 Bible Online

ויקרא 19 - כֶּתֶר אֲרָם צוֹבָא - Tanah Aleppo Codex bible

ויקרא 19

¹א וידבר יהוה אל משה לאמר

²ב דבר אל כל עדת בני ישראל ואמרת אלהם--קדשים תהיו כי קדוש אני יהוה אלהיכם

³ג איש אמו ואביו תיראו ואת שבתתי תשמרו אני יהוה אלהיכם

⁴ד אל תפנו אל האלילם ואלהי מסכה לא תעשו לכם אני יהוה אלהיכם

⁵ה וכי תזבחו זבח שלמים ליהוה--לרצנכם תזבחהו

⁶ו ביום זבחכם יאכל וממחרת והנותר עד יום השלישי באש ישרף

⁷ז ואם האכל יאכל ביום השלישי--פגול הוא לא ירצה

⁸ח ואכליו עונו ישא כי את קדש יהוה חלל ונכרתה הנפש ההוא מעמיה

⁹ט ובקצרכם את קציר ארצכם לא תכלה פאת שדך לקצר ולקט קצירך לא תלקט

¹⁰י וכרמך לא תעולל ופרט כרמך לא תלקט לעני ולגר תעזב אתם אני יהוה אלהיכם

¹¹יא לא תגנבו ולא תכחשו ולא תשקרו איש בעמיתו

¹²יב ולא תשבעו בשמי לשקר וחללת את שם אלהיך אני יהוה

¹³יג לא תעשק את רעך ולא תגזל לא תלין פעלת שכיר אתך--עד בקר

¹⁴יד לא תקלל חרש--ולפני עור לא תתן מכשל ויראת מאלהיך אני יהוה

¹⁵טו לא תעשו עול במשפט--לא תשא פני דל ולא תהדר פני גדול בצדק תשפט עמיתך

¹⁶טז לא תלך רכיל בעמיך לא תעמד על דם רעך אני יהוה

¹⁷יז לא תשנא את אחיך בלבבך הוכח תוכיח את עמיתך ולא תשא עליו חטא

¹⁸יח לא תקם ולא תטר את בני עמך ואהבת לרעך כמוך אני יהוה

¹⁹יט את חקתי תשמרו--בהמתך לא תרביע כלאים שדך לא תזרע כלאים ובגד כלאים שעטנז לא יעלה עליך

²⁰כ ואיש כי ישכב את אשה שכבת זרע והוא שפחה נחרפת לאיש והפדה לא נפדתה או חפשה לא נתן לה--בקרת תהיה לא יומתו כי לא חפשה

²¹כא והביא את אשמו ליהוה אל פתח אהל מועד--איל אשם

²²כב וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא {פ}

²³כג וכי תבאו אל הארץ ונטעתם כל עץ מאכל--וערלתם ערלתו את פריו שלש שנים יהיה לכם ערלים--לא יאכל

²⁴כד ובשנה הרביעת יהיה כל פריו--קדש הלולים ליהוה

²⁵כה ובשנה החמישת תאכלו את פריו להוסיף לכם תבואתו אני יהוה אלהיכם

²⁶כו לא תאכלו על הדם לא תנחשו ולא תעוננו

²⁷כז לא תקפו פאת ראשכם ולא תשחית את פאת זקנך

²⁸כח ושרט לנפש לא תתנו בבשרכם וכתבת קעקע לא תתנו בכם אני יהוה

²⁹כט אל תחלל את בתך להזנותה ולא תזנה הארץ ומלאה הארץ זמה

³⁰ל את שבתתי תשמרו ומקדשי תיראו אני יהוה

³¹לא אל תפנו אל האבת ואל הידענים אל תבקשו לטמאה בהם אני יהוה אלהיכם

³²לב מפני שיבה תקום והדרת פני זקן ויראת מאלהיך אני יהוה {ס}

³³לג וכי יגור אתך גר בארצכם--לא תונו אתו

³⁴לד כאזרח מכם יהיה לכם הגר הגר אתכם ואהבת לו כמוך--כי גרים הייתם בארץ מצרים אני יהוה אלהיכם

³⁵לה לא תעשו עול במשפט במדה במשקל ובמשורה

³⁶לו מאזני צדק אבני צדק איפת צדק והין צדק--יהיה לכם אני יהוה אלהיכם אשר הוצאתי אתכם מארץ מצרים

³⁷לז ושמרתם את כל חקתי ואת כל משפטי ועשיתם אתם אני יהוה {פ}