Read כֶּתֶר אֲרָם צוֹבָא - Tanah Aleppo Codex ויקרא 2 Bible Online

ויקרא 2 - כֶּתֶר אֲרָם צוֹבָא - Tanah Aleppo Codex bible

ויקרא 2

¹א ונפש כי תקריב קרבן מנחה ליהוה--סלת יהיה קרבנו ויצק עליה שמן ונתן עליה לבנה

²ב והביאה אל בני אהרן הכהנים וקמץ משם מלא קמצו מסלתה ומשמנה על כל לבנתה והקטיר הכהן את אזכרתה המזבחה--אשה ריח ניחח ליהוה

³ג והנותרת מן המנחה--לאהרן ולבניו קדש קדשים מאשי יהוה {ס}

⁴ד וכי תקרב קרבן מנחה מאפה תנור--סלת חלות מצת בלולת בשמן ורקיקי מצות משחים בשמן {ס}

⁵ה ואם מנחה על המחבת קרבנך--סלת בלולה בשמן מצה תהיה

⁶ו פתות אתה פתים ויצקת עליה שמן מנחה הוא {ס}

⁷ז ואם מנחת מרחשת קרבנך--סלת בשמן תעשה

⁸ח והבאת את המנחה אשר יעשה מאלה--ליהוה והקריבה אל הכהן והגישה אל המזבח

⁹ט והרים הכהן מן המנחה את אזכרתה והקטיר המזבחה--אשה ריח ניחח ליהוה

¹⁰י והנותרת מן המנחה--לאהרן ולבניו קדש קדשים מאשי יהוה

¹¹יא כל המנחה אשר תקריבו ליהוה--לא תעשה חמץ כי כל שאר וכל דבש לא תקטירו ממנו אשה ליהוה

¹²יב קרבן ראשית תקריבו אתם ליהוה ואל המזבח לא יעלו לריח ניחח

¹³יג וכל קרבן מנחתך במלח תמלח ולא תשבית מלח ברית אלהיך מעל מנחתך על כל קרבנך תקריב מלח {ס}

¹⁴יד ואם תקריב מנחת בכורים ליהוה--אביב קלוי באש גרש כרמל תקריב את מנחת בכוריך

¹⁵טו ונתת עליה שמן ושמת עליה לבנה מנחה הוא

¹⁶טז והקטיר הכהן את אזכרתה מגרשה ומשמנה על כל לבנתה--אשה ליהוה {פ}