Read כֶּתֶר אֲרָם צוֹבָא - Tanah Aleppo Codex ויקרא 23 Bible Online

ויקרא 23 - כֶּתֶר אֲרָם צוֹבָא - Tanah Aleppo Codex bible

ויקרא 23

¹א וידבר יהוה אל משה לאמר

²ב דבר אל בני ישראל ואמרת אלהם מועדי יהוה אשר תקראו אתם מקראי קדש--אלה הם מועדי

³ג ששת ימים תעשה מלאכה וביום השביעי שבת שבתון מקרא קדש כל מלאכה לא תעשו שבת הוא ליהוה בכל מושבתיכם {פ}

⁴ד אלה מועדי יהוה מקראי קדש אשר תקראו אתם במועדם

⁵ה בחדש הראשון בארבעה עשר לחדש--בין הערבים פסח ליהוה

⁶ו ובחמשה עשר יום לחדש הזה חג המצות ליהוה שבעת ימים מצות תאכלו

⁷ז ביום הראשון מקרא קדש יהיה לכם כל מלאכת עבדה לא תעשו

⁸ח והקרבתם אשה ליהוה שבעת ימים ביום השביעי מקרא קדש כל מלאכת עבדה לא תעשו {פ}

⁹ט וידבר יהוה אל משה לאמר

¹⁰י דבר אל בני ישראל ואמרת אלהם כי תבאו אל הארץ אשר אני נתן לכם וקצרתם את קצירה--והבאתם את עמר ראשית קצירכם אל הכהן

¹¹יא והניף את העמר לפני יהוה לרצנכם ממחרת השבת יניפנו הכהן

¹²יב ועשיתם ביום הניפכם את העמר כבש תמים בן שנתו לעלה ליהוה

¹³יג ומנחתו שני עשרנים סלת בלולה בשמן אשה ליהוה--ריח ניחח ונסכה יין רביעת ההין

¹⁴יד ולחם וקלי וכרמל לא תאכלו עד עצם היום הזה--עד הביאכם את קרבן אלהיכם חקת עולם לדרתיכם בכל משבתיכם {ס}

¹⁵טו וספרתם לכם ממחרת השבת מיום הביאכם את עמר התנופה שבע שבתות תמימת תהיינה

¹⁶טז עד ממחרת השבת השביעת תספרו חמשים יום והקרבתם מנחה חדשה ליהוה

¹⁷יז ממושבתיכם תביאו לחם תנופה שתים שני עשרנים--סלת תהיינה חמץ תאפינה בכורים ליהוה

¹⁸יח והקרבתם על הלחם שבעת כבשים תמימם בני שנה ופר בן בקר אחד ואילם שנים יהיו עלה ליהוה ומנחתם ונסכיהם אשה ריח ניחח ליהוה

¹⁹יט ועשיתם שעיר עזים אחד לחטאת ושני כבשים בני שנה לזבח שלמים

²⁰כ והניף הכהן אתם על לחם הבכרים תנופה לפני יהוה על שני כבשים קדש יהיו ליהוה לכהן

²¹כא וקראתם בעצם היום הזה מקרא קדש יהיה לכם--כל מלאכת עבדה לא תעשו חקת עולם בכל מושבתיכם לדרתיכם

²²כב ובקצרכם את קציר ארצכם לא תכלה פאת שדך בקצרך ולקט קצירך לא תלקט לעני ולגר תעזב אתם אני יהוה אלהיכם {פ}

²³כג וידבר יהוה אל משה לאמר

²⁴כד דבר אל בני ישראל לאמר בחדש השביעי באחד לחדש יהיה לכם שבתון--זכרון תרועה מקרא קדש

²⁵כה כל מלאכת עבדה לא תעשו והקרבתם אשה ליהוה {ס}

²⁶כו וידבר יהוה אל משה לאמר

²⁷כז אך בעשור לחדש השביעי הזה יום הכפרים הוא מקרא קדש יהיה לכם ועניתם את נפשתיכם והקרבתם אשה ליהוה

²⁸כח וכל מלאכה לא תעשו בעצם היום הזה כי יום כפרים הוא לכפר עליכם לפני יהוה אלהיכם

²⁹כט כי כל הנפש אשר לא תענה בעצם היום הזה--ונכרתה מעמיה

³⁰ל וכל הנפש אשר תעשה כל מלאכה בעצם היום הזה--והאבדתי את הנפש ההוא מקרב עמה

³¹לא כל מלאכה לא תעשו חקת עולם לדרתיכם בכל משבתיכם

³²לב שבת שבתון הוא לכם ועניתם את נפשתיכם בתשעה לחדש בערב--מערב עד ערב תשבתו שבתכם {פ}

³³לג וידבר יהוה אל משה לאמר

³⁴לד דבר אל בני ישראל לאמר בחמשה עשר יום לחדש השביעי הזה חג הסכות שבעת ימים ליהוה

³⁵לה ביום הראשון מקרא קדש כל מלאכת עבדה לא תעשו

³⁶לו שבעת ימים תקריבו אשה ליהוה ביום השמיני מקרא קדש יהיה לכם והקרבתם אשה ליהוה עצרת הוא--כל מלאכת עבדה לא תעשו

³⁷לז אלה מועדי יהוה אשר תקראו אתם מקראי קדש להקריב אשה ליהוה עלה ומנחה זבח ונסכים--דבר יום ביומו

³⁸לח מלבד שבתת יהוה ומלבד מתנותיכם ומלבד כל נדריכם ומלבד כל נדבתיכם אשר תתנו ליהוה

³⁹לט אך בחמשה עשר יום לחדש השביעי באספכם את תבואת הארץ תחגו את חג יהוה שבעת ימים ביום הראשון שבתון וביום השמיני שבתון

⁴⁰מ ולקחתם לכם ביום הראשון פרי עץ הדר כפת תמרים וענף עץ עבת וערבי נחל ושמחתם לפני יהוה אלהיכם--שבעת ימים

⁴¹מא וחגתם אתו חג ליהוה שבעת ימים בשנה חקת עולם לדרתיכם בחדש השביעי תחגו אתו

⁴²מב בסכת תשבו שבעת ימים כל האזרח בישראל ישבו בסכת

⁴³מג למען ידעו דרתיכם כי בסכות הושבתי את בני ישראל בהוציאי אותם מארץ מצרים אני יהוה אלהיכם

⁴⁴מד וידבר משה את מעדי יהוה אל בני ישראל {פ}