Read כֶּתֶר אֲרָם צוֹבָא - Tanah Aleppo Codex ויקרא 25 Bible Online

ויקרא 25 - כֶּתֶר אֲרָם צוֹבָא - Tanah Aleppo Codex bible

ויקרא 25

¹א וידבר יהוה אל משה בהר סיני לאמר

²ב דבר אל בני ישראל ואמרת אלהם כי תבאו אל הארץ אשר אני נתן לכם--ושבתה הארץ שבת ליהוה

³ג שש שנים תזרע שדך ושש שנים תזמר כרמך ואספת את תבואתה

⁴ד ובשנה השביעת שבת שבתון יהיה לארץ--שבת ליהוה שדך לא תזרע וכרמך לא תזמר

⁵ה את ספיח קצירך לא תקצור ואת ענבי נזירך לא תבצר שנת שבתון יהיה לארץ

⁶ו והיתה שבת הארץ לכם לאכלה--לך ולעבדך ולאמתך ולשכירך ולתושבך הגרים עמך

⁷ז ולבהמתך--ולחיה אשר בארצך תהיה כל תבואתה לאכל {ס}

⁸ח וספרת לך שבע שבתת שנים--שבע שנים שבע פעמים והיו לך ימי שבע שבתת השנים תשע וארבעים שנה

⁹ט והעברת שופר תרועה בחדש השבעי בעשור לחדש ביום הכפרים תעבירו שופר בכל ארצכם

¹⁰י וקדשתם את שנת החמשים שנה וקראתם דרור בארץ לכל ישביה יובל הוא תהיה לכם ושבתם איש אל אחזתו ואיש אל משפחתו תשבו

¹¹יא יובל הוא שנת החמשים שנה--תהיה לכם לא תזרעו--ולא תקצרו את ספיחיה ולא תבצרו את נזריה

¹²יב כי יובל הוא קדש תהיה לכם מן השדה--תאכלו את תבואתה

¹³יג בשנת היובל הזאת תשבו איש אל אחזתו

¹⁴יד וכי תמכרו ממכר לעמיתך או קנה מיד עמיתך--אל תונו איש את אחיו

¹⁵טו במספר שנים אחר היובל תקנה מאת עמיתך במספר שני תבואת ימכר לך

¹⁶טז לפי רב השנים תרבה מקנתו ולפי מעט השנים תמעיט מקנתו כי מספר תבואת הוא מכר לך

¹⁷יז ולא תונו איש את עמיתו ויראת מאלהיך כי אני יהוה אלהיכם

¹⁸יח ועשיתם את חקתי ואת משפטי תשמרו ועשיתם אתם--וישבתם על הארץ לבטח

¹⁹יט ונתנה הארץ פריה ואכלתם לשבע וישבתם לבטח עליה

²⁰כ וכי תאמרו מה נאכל בשנה השביעת הן לא נזרע ולא נאסף את תבואתנו

²¹כא וצויתי את ברכתי לכם בשנה הששית ועשת את התבואה לשלש השנים

²²כב וזרעתם את השנה השמינת ואכלתם מן התבואה ישן עד השנה התשיעת עד בוא תבואתה--תאכלו ישן

²³כג והארץ לא תמכר לצמתת--כי לי הארץ כי גרים ותושבים אתם עמדי

²⁴כד ובכל ארץ אחזתכם גאלה תתנו לארץ {ס}

²⁵כה כי ימוך אחיך ומכר מאחזתו--ובא גאלו הקרב אליו וגאל את ממכר אחיו

²⁶כו ואיש כי לא יהיה לו גאל והשיגה ידו ומצא כדי גאלתו

²⁷כז וחשב את שני ממכרו והשיב את העדף לאיש אשר מכר לו ושב לאחזתו

²⁸כח ואם לא מצאה ידו די השיב לו--והיה ממכרו ביד הקנה אתו עד שנת היובל ויצא ביבל ושב לאחזתו {ס}

²⁹כט ואיש כי ימכר בית מושב עיר חומה--והיתה גאלתו עד תם שנת ממכרו ימים תהיה גאלתו

³⁰ל ואם לא יגאל עד מלאת לו שנה תמימה--וקם הבית אשר בעיר אשר לא (לו) חמה לצמיתת לקנה אתו לדרתיו לא יצא ביבל

³¹לא ובתי החצרים אשר אין להם חמה סביב--על שדה הארץ יחשב גאלה תהיה לו וביבל יצא

³²לב וערי הלוים--בתי ערי אחזתם גאלת עולם תהיה ללוים

³³לג ואשר יגאל מן הלוים ויצא ממכר בית ועיר אחזתו ביבל כי בתי ערי הלוים הוא אחזתם בתוך בני ישראל

³⁴לד ושדה מגרש עריהם לא ימכר כי אחזת עולם הוא להם {ס}

³⁵לה וכי ימוך אחיך ומטה ידו עמך--והחזקת בו גר ותושב וחי עמך

³⁶לו אל תקח מאתו נשך ותרבית ויראת מאלהיך וחי אחיך עמך

³⁷לז את כספך--לא תתן לו בנשך ובמרבית לא תתן אכלך

³⁸לח אני יהוה אלהיכם אשר הוצאתי אתכם מארץ מצרים--לתת לכם את ארץ כנען להיות לכם לאלהים {ס}

³⁹לט וכי ימוך אחיך עמך ונמכר לך--לא תעבד בו עבדת עבד

⁴⁰מ כשכיר כתושב יהיה עמך עד שנת היבל יעבד עמך

⁴¹מא ויצא מעמך--הוא ובניו עמו ושב אל משפחתו ואל אחזת אבתיו ישוב

⁴²מב כי עבדי הם אשר הוצאתי אתם מארץ מצרים לא ימכרו ממכרת עבד

⁴³מג לא תרדה בו בפרך ויראת מאלהיך

⁴⁴מד ועבדך ואמתך אשר יהיו לך מאת הגוים אשר סביבתיכם--מהם תקנו עבד ואמה

⁴⁵מה וגם מבני התושבים הגרים עמכם מהם תקנו וממשפחתם אשר עמכם אשר הולידו בארצכם והיו לכם לאחזה

⁴⁶מו והתנחלתם אתם לבניכם אחריכם לרשת אחזה--לעלם בהם תעבדו ובאחיכם בני ישראל איש באחיו לא תרדה בו בפרך {ס}

⁴⁷מז וכי תשיג יד גר ותושב עמך ומך אחיך עמו ונמכר לגר תושב עמך או לעקר משפחת גר

⁴⁸מח אחרי נמכר גאלה תהיה לו אחד מאחיו יגאלנו

⁴⁹מט או דדו או בן דדו יגאלנו או משאר בשרו ממשפחתו יגאלנו או השיגה ידו ונגאל

⁵⁰נ וחשב עם קנהו משנת המכרו לו עד שנת היבל והיה כסף ממכרו במספר שנים כימי שכיר יהיה עמו

⁵¹נא אם עוד רבות בשנים--לפיהן ישיב גאלתו מכסף מקנתו

⁵²נב ואם מעט נשאר בשנים עד שנת היבל--וחשב לו כפי שניו ישיב את גאלתו

⁵³נג כשכיר שנה בשנה יהיה עמו לא ירדנו בפרך לעיניך

⁵⁴נד ואם לא יגאל באלה--ויצא בשנת היבל הוא ובניו עמו

⁵⁵נה כי לי בני ישראל עבדים--עבדי הם אשר הוצאתי אותם מארץ מצרים אני יהוה אלהיכם