Read כֶּתֶר אֲרָם צוֹבָא - Tanah Aleppo Codex ויקרא 26 Bible Online

ויקרא 26 - כֶּתֶר אֲרָם צוֹבָא - Tanah Aleppo Codex bible

ויקרא 26

¹א לא תעשו לכם אלילם ופסל ומצבה לא תקימו לכם ואבן משכית לא תתנו בארצכם להשתחות עליה כי אני יהוה אלהיכם

²ב את שבתתי תשמרו ומקדשי תיראו אני יהוה {פ}

³ג אם בחקתי תלכו ואת מצותי תשמרו ועשיתם אתם

⁴ד ונתתי גשמיכם בעתם ונתנה הארץ יבולה ועץ השדה יתן פריו

⁵ה והשיג לכם דיש את בציר ובציר ישיג את זרע ואכלתם לחמכם לשבע וישבתם לבטח בארצכם

⁶ו ונתתי שלום בארץ ושכבתם ואין מחריד והשבתי חיה רעה מן הארץ וחרב לא תעבר בארצכם

⁷ז ורדפתם את איביכם ונפלו לפניכם לחרב

⁸ח ורדפו מכם חמשה מאה ומאה מכם רבבה ירדפו ונפלו איביכם לפניכם לחרב

⁹ט ופניתי אליכם--והפריתי אתכם והרביתי אתכם והקימתי את בריתי אתכם

¹⁰י ואכלתם ישן נושן וישן מפני חדש תוציאו

¹¹יא ונתתי משכני בתוככם ולא תגעל נפשי אתכם

¹²יב והתהלכתי בתוככם והייתי לכם לאלהים ואתם תהיו לי לעם

¹³יג אני יהוה אלהיכם אשר הוצאתי אתכם מארץ מצרים מהית להם עבדים ואשבר מטת עלכם ואולך אתכם קוממיות {פ}

¹⁴יד ואם לא תשמעו לי ולא תעשו את כל המצות האלה

¹⁵טו ואם בחקתי תמאסו ואם את משפטי תגעל נפשכם לבלתי עשות את כל מצותי להפרכם את בריתי

¹⁶טז אף אני אעשה זאת לכם והפקדתי עליכם בהלה את השחפת ואת הקדחת מכלות עינים ומדיבת נפש וזרעתם לריק זרעכם ואכלהו איביכם

¹⁷יז ונתתי פני בכם ונגפתם לפני איביכם ורדו בכם שנאיכם ונסתם ואין רדף אתכם

¹⁸יח ואם עד אלה--לא תשמעו לי ויספתי ליסרה אתכם שבע על חטאתיכם

¹⁹יט ושברתי את גאון עזכם ונתתי את שמיכם כברזל ואת ארצכם כנחשה

²⁰כ ותם לריק כחכם ולא תתן ארצכם את יבולה ועץ הארץ לא יתן פריו

²¹כא ואם תלכו עמי קרי ולא תאבו לשמע לי--ויספתי עליכם מכה שבע כחטאתיכם

²²כב והשלחתי בכם את חית השדה ושכלה אתכם והכריתה את בהמתכם והמעיטה אתכם ונשמו דרכיכם

²³כג ואם באלה--לא תוסרו לי והלכתם עמי קרי

²⁴כד והלכתי אף אני עמכם בקרי והכיתי אתכם גם אני שבע על חטאתיכם

²⁵כה והבאתי עליכם חרב נקמת נקם ברית ונאספתם אל עריכם ושלחתי דבר בתוככם ונתתם ביד אויב

²⁶כו בשברי לכם מטה לחם ואפו עשר נשים לחמכם בתנור אחד והשיבו לחמכם במשקל ואכלתם ולא תשבעו {ס}

²⁷כז ואם בזאת--לא תשמעו לי והלכתם עמי בקרי

²⁸כח והלכתי עמכם בחמת קרי ויסרתי אתכם אף אני שבע על חטאתיכם

²⁹כט ואכלתם בשר בניכם ובשר בנתיכם תאכלו

³⁰ל והשמדתי את במתיכם והכרתי את חמניכם ונתתי את פגריכם על פגרי גלוליכם וגעלה נפשי אתכם

³¹לא ונתתי את עריכם חרבה והשמותי את מקדשיכם ולא אריח בריח ניחחכם

³²לב והשמתי אני את הארץ ושממו עליה איביכם הישבים בה

³³לג ואתכם אזרה בגוים והריקתי אחריכם חרב והיתה ארצכם שממה ועריכם יהיו חרבה

³⁴לד אז תרצה הארץ את שבתתיה כל ימי השמה ואתם בארץ איביכם אז תשבת הארץ והרצת את שבתתיה

³⁵לה כל ימי השמה תשבת את אשר לא שבתה בשבתתיכם בשבתכם עליה

³⁶לו והנשארים בכם--והבאתי מרך בלבבם בארצת איביהם ורדף אתם קול עלה נדף ונסו מנסת חרב ונפלו ואין רדף

³⁷לז וכשלו איש באחיו כמפני חרב ורדף אין ולא תהיה לכם תקומה לפני איביכם

³⁸לח ואבדתם בגוים ואכלה אתכם ארץ איביכם

³⁹לט והנשארים בכם ימקו בעונם בארצת איביכם ואף בעונת אבתם אתם ימקו

⁴⁰מ והתודו את עונם ואת עון אבתם במעלם אשר מעלו בי ואף אשר הלכו עמי בקרי

⁴¹מא אף אני אלך עמם בקרי והבאתי אתם בארץ איביהם או אז יכנע לבבם הערל ואז ירצו את עונם

⁴²מב וזכרתי את בריתי יעקוב ואף את בריתי יצחק ואף את בריתי אברהם אזכר--והארץ אזכר

⁴³מג והארץ תעזב מהם ותרץ את שבתתיה בהשמה מהם והם ירצו את עונם יען וביען--במשפטי מאסו ואת חקתי געלה נפשם

⁴⁴מד ואף גם זאת בהיותם בארץ איביהם לא מאסתים ולא געלתים לכלתם--להפר בריתי אתם כי אני יהוה אלהיהם

⁴⁵מה וזכרתי להם ברית ראשנים אשר הוצאתי אתם מארץ מצרים לעיני הגוים להיות להם לאלהים--אני יהוה

⁴⁶מו אלה החקים והמשפטים והתורת אשר נתן יהוה בינו ובין בני ישראל--בהר סיני ביד משה {פ}