Read כֶּתֶר אֲרָם צוֹבָא - Tanah Aleppo Codex ויקרא 27 Bible Online

ויקרא 27 - כֶּתֶר אֲרָם צוֹבָא - Tanah Aleppo Codex bible

ויקרא 27

¹א וידבר יהוה אל משה לאמר

²ב דבר אל בני ישראל ואמרת אלהם איש כי יפלא נדר--בערכך נפשת ליהוה

³ג והיה ערכך הזכר מבן עשרים שנה ועד בן ששים שנה והיה ערכך חמשים שקל כסף--בשקל הקדש

⁴ד ואם נקבה הוא--והיה ערכך שלשים שקל

⁵ה ואם מבן חמש שנים ועד בן עשרים שנה--והיה ערכך הזכר עשרים שקלים ולנקבה עשרת שקלים

⁶ו ואם מבן חדש ועד בן חמש שנים--והיה ערכך הזכר חמשה שקלים כסף ולנקבה ערכך שלשת שקלים כסף

⁷ז ואם מבן ששים שנה ומעלה אם זכר--והיה ערכך חמשה עשר שקל ולנקבה עשרה שקלים

⁸ח ואם מך הוא מערכך--והעמידו לפני הכהן והעריך אתו הכהן על פי אשר תשיג יד הנדר--יעריכנו הכהן {ס}

⁹ט ואם בהמה--אשר יקריבו ממנה קרבן ליהוה כל אשר יתן ממנו ליהוה יהיה קדש

¹⁰י לא יחליפנו ולא ימיר אתו טוב ברע--או רע בטוב ואם המר ימיר בהמה בבהמה והיה הוא ותמורתו יהיה קדש

¹¹יא ואם כל בהמה טמאה אשר לא יקריבו ממנה קרבן ליהוה--והעמיד את הבהמה לפני הכהן

¹²יב והעריך הכהן אתה בין טוב ובין רע כערכך הכהן כן יהיה

¹³יג ואם גאל יגאלנה--ויסף חמישתו על ערכך

¹⁴יד ואיש כי יקדש את ביתו קדש ליהוה--והעריכו הכהן בין טוב ובין רע כאשר יעריך אתו הכהן כן יקום

¹⁵טו ואם המקדיש--יגאל את ביתו ויסף חמישית כסף ערכך עליו--והיה לו

¹⁶טז ואם משדה אחזתו יקדיש איש ליהוה--והיה ערכך לפי זרעו זרע חמר שערים בחמשים שקל כסף

¹⁷יז אם משנת היבל יקדיש שדהו--כערכך יקום

¹⁸יח ואם אחר היבל יקדיש שדהו--וחשב לו הכהן את הכסף על פי השנים הנותרת עד שנת היבל ונגרע מערכך

¹⁹יט ואם גאל יגאל את השדה המקדיש אתו ויסף חמשית כסף ערכך עליו--וקם לו

²⁰כ ואם לא יגאל את השדה ואם מכר את השדה לאיש אחר--לא יגאל עוד

²¹כא והיה השדה בצאתו ביבל קדש ליהוה--כשדה החרם לכהן תהיה אחזתו

²²כב ואם את שדה מקנתו אשר לא משדה אחזתו--יקדיש ליהוה

²³כג וחשב לו הכהן את מכסת הערכך עד שנת היבל ונתן את הערכך ביום ההוא קדש ליהוה

²⁴כד בשנת היובל ישוב השדה לאשר קנהו מאתו--לאשר לו אחזת הארץ

²⁵כה וכל ערכך--יהיה בשקל הקדש עשרים גרה יהיה השקל

²⁶כו אך בכור אשר יבכר ליהוה בבהמה--לא יקדיש איש אתו אם שור אם שה ליהוה הוא

²⁷כז ואם בבהמה הטמאה ופדה בערכך ויסף חמשתו עליו ואם לא יגאל ונמכר בערכך

²⁸כח אך כל חרם אשר יחרם איש ליהוה מכל אשר לו מאדם ובהמה ומשדה אחזתו--לא ימכר ולא יגאל כל חרם קדש קדשים הוא ליהוה

²⁹כט כל חרם אשר יחרם מן האדם--לא יפדה מות יומת

³⁰ל וכל מעשר הארץ מזרע הארץ מפרי העץ--ליהוה הוא קדש ליהוה

³¹לא ואם גאל יגאל איש ממעשרו--חמשיתו יסף עליו

³²לב וכל מעשר בקר וצאן כל אשר יעבר תחת השבט--העשירי יהיה קדש ליהוה

³³לג לא יבקר בין טוב לרע ולא ימירנו ואם המר ימירנו והיה הוא ותמורתו יהיה קדש לא יגאל

³⁴לד אלה המצות אשר צוה יהוה את משה--אל בני ישראל בהר סיני {ש}