Read כֶּתֶר אֲרָם צוֹבָא - Tanah Aleppo Codex ויקרא 7 Bible Online

ויקרא 7 - כֶּתֶר אֲרָם צוֹבָא - Tanah Aleppo Codex bible

ויקרא 7

¹א וזאת תורת האשם קדש קדשים הוא

²ב במקום אשר ישחטו את העלה ישחטו את האשם ואת דמו יזרק על המזבח סביב

³ג ואת כל חלבו יקריב ממנו--את האליה ואת החלב המכסה את הקרב

⁴ד ואת שתי הכלית ואת החלב אשר עליהן אשר על הכסלים ואת היתרת על הכבד על הכלית יסירנה

⁵ה והקטיר אתם הכהן המזבחה אשה ליהוה אשם הוא

⁶ו כל זכר בכהנים יאכלנו במקום קדוש יאכל קדש קדשים הוא

⁷ז כחטאת כאשם--תורה אחת להם הכהן אשר יכפר בו לו יהיה

⁸ח והכהן--המקריב את עלת איש עור העלה אשר הקריב לכהן לו יהיה

⁹ט וכל מנחה אשר תאפה בתנור וכל נעשה במרחשת ועל מחבת--לכהן המקריב אתה לו תהיה

¹⁰י וכל מנחה בלולה בשמן וחרבה--לכל בני אהרן תהיה איש כאחיו {פ}

¹¹יא וזאת תורת זבח השלמים אשר יקריב ליהוה

¹²יב אם על תודה יקריבנו--והקריב על זבח התודה חלות מצות בלולת בשמן ורקיקי מצות משחים בשמן וסלת מרבכת חלת בלולת בשמן

¹³יג על חלת לחם חמץ יקריב קרבנו על זבח תודת שלמיו

¹⁴יד והקריב ממנו אחד מכל קרבן תרומה ליהוה לכהן הזרק את דם השלמים--לו יהיה

¹⁵טו ובשר זבח תודת שלמיו--ביום קרבנו יאכל לא יניח ממנו עד בקר

¹⁶טז ואם נדר או נדבה זבח קרבנו--ביום הקריבו את זבחו יאכל וממחרת והנותר ממנו יאכל

¹⁷יז והנותר מבשר הזבח--ביום השלישי באש ישרף

¹⁸יח ואם האכל יאכל מבשר זבח שלמיו ביום השלישי לא ירצה--המקריב אתו לא יחשב לו פגול יהיה והנפש האכלת ממנו עונה תשא

¹⁹יט והבשר אשר יגע בכל טמא לא יאכל--באש ישרף והבשר--כל טהור יאכל בשר

²⁰כ והנפש אשר תאכל בשר מזבח השלמים אשר ליהוה וטמאתו עליו--ונכרתה הנפש ההוא מעמיה

²¹כא ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה--ונכרתה הנפש ההוא מעמיה {פ}

²²כב וידבר יהוה אל משה לאמר

²³כג דבר אל בני ישראל לאמר כל חלב שור וכשב ועז--לא תאכלו

²⁴כד וחלב נבלה וחלב טרפה יעשה לכל מלאכה ואכל לא תאכלהו

²⁵כה כי כל אכל חלב מן הבהמה אשר יקריב ממנה אשה ליהוה--ונכרתה הנפש האכלת מעמיה

²⁶כו וכל דם לא תאכלו בכל מושבתיכם לעוף ולבהמה

²⁷כז כל נפש אשר תאכל כל דם--ונכרתה הנפש ההוא מעמיה

²⁸כח וידבר יהוה אל משה לאמר

²⁹כט דבר אל בני ישראל לאמר המקריב את זבח שלמיו ליהוה--יביא את קרבנו ליהוה מזבח שלמיו

³⁰ל ידיו תביאינה את אשי יהוה את החלב על החזה יביאנו--את החזה להניף אתו תנופה לפני יהוה

³¹לא והקטיר הכהן את החלב המזבחה והיה החזה לאהרן ולבניו

³²לב ואת שוק הימין תתנו תרומה לכהן מזבחי שלמיכם

³³לג המקריב את דם השלמים ואת החלב--מבני אהרן לו תהיה שוק הימין למנה

³⁴לד כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל

³⁵לה זאת משחת אהרן ומשחת בניו מאשי יהוה ביום הקריב אתם לכהן ליהוה

³⁶לו אשר צוה יהוה לתת להם ביום משחו אתם מאת בני ישראל--חקת עולם לדרתם

³⁷לז זאת התורה לעלה למנחה ולחטאת ולאשם ולמלואים--ולזבח השלמים

³⁸לח אשר צוה יהוה את משה בהר סיני ביום צותו את בני ישראל להקריב את קרבניהם ליהוה--במדבר סיני {פ}