Read כֶּתֶר אֲרָם צוֹבָא - Tanah Aleppo Codex ויקרא 8 Bible Online

ויקרא 8 - כֶּתֶר אֲרָם צוֹבָא - Tanah Aleppo Codex bible

ויקרא 8

¹א וידבר יהוה אל משה לאמר

²ב קח את אהרן ואת בניו אתו ואת הבגדים ואת שמן המשחה ואת פר החטאת ואת שני האילים ואת סל המצות

³ג ואת כל העדה הקהל אל פתח אהל מועד

⁴ד ויעש משה כאשר צוה יהוה אתו ותקהל העדה אל פתח אהל מועד

⁵ה ויאמר משה אל העדה זה הדבר אשר צוה יהוה לעשות

⁶ו ויקרב משה את אהרן ואת בניו וירחץ אתם במים

⁷ז ויתן עליו את הכתנת ויחגר אתו באבנט וילבש אתו את המעיל ויתן עליו את האפד ויחגר אתו בחשב האפד ויאפד לו בו

⁸ח וישם עליו את החשן ויתן אל החשן את האורים ואת התמים

⁹ט וישם את המצנפת על ראשו וישם על המצנפת אל מול פניו את ציץ הזהב נזר הקדש כאשר צוה יהוה את משה

¹⁰י ויקח משה את שמן המשחה וימשח את המשכן ואת כל אשר בו ויקדש אתם

¹¹יא ויז ממנו על המזבח שבע פעמים וימשח את המזבח ואת כל כליו ואת הכיר ואת כנו--לקדשם

¹²יב ויצק משמן המשחה על ראש אהרן וימשח אתו לקדשו

¹³יג ויקרב משה את בני אהרן וילבשם כתנת ויחגר אתם אבנט ויחבש להם מגבעות--כאשר צוה יהוה את משה

¹⁴יד ויגש את פר החטאת ויסמך אהרן ובניו את ידיהם על ראש פר החטאת

¹⁵טו וישחט ויקח משה את הדם ויתן על קרנות המזבח סביב באצבעו ויחטא את המזבח ואת הדם יצק אל יסוד המזבח ויקדשהו לכפר עליו

¹⁶טז ויקח את כל החלב אשר על הקרב ואת יתרת הכבד ואת שתי הכלית ואת חלבהן ויקטר משה המזבחה

¹⁷יז ואת הפר ואת ערו ואת בשרו ואת פרשו--שרף באש מחוץ למחנה כאשר צוה יהוה את משה

¹⁸יח ויקרב את איל העלה ויסמכו אהרן ובניו את ידיהם--על ראש האיל

¹⁹יט וישחט ויזרק משה את הדם על המזבח סביב

²⁰כ ואת האיל--נתח לנתחיו ויקטר משה את הראש ואת הנתחים ואת הפדר

²¹כא ואת הקרב ואת הכרעים רחץ במים ויקטר משה את כל האיל המזבחה עלה הוא לריח ניחח אשה הוא ליהוה כאשר צוה יהוה את משה

²²כב ויקרב את האיל השני איל המלאים ויסמכו אהרן ובניו את ידיהם--על ראש האיל

²³כג וישחט--ויקח משה מדמו ויתן על תנוך אזן אהרן הימנית ועל בהן ידו הימנית ועל בהן רגלו הימנית

²⁴כד ויקרב את בני אהרן ויתן משה מן הדם על תנוך אזנם הימנית ועל בהן ידם הימנית ועל בהן רגלם הימנית ויזרק משה את הדם על המזבח סביב

²⁵כה ויקח את החלב ואת האליה ואת כל החלב אשר על הקרב ואת יתרת הכבד ואת שתי הכלית ואת חלבהן ואת שוק הימין

²⁶כו ומסל המצות אשר לפני יהוה לקח חלת מצה אחת וחלת לחם שמן אחת--ורקיק אחד וישם על החלבים ועל שוק הימין

²⁷כז ויתן את הכל--על כפי אהרן ועל כפי בניו וינף אתם תנופה לפני יהוה

²⁸כח ויקח משה אתם מעל כפיהם ויקטר המזבחה על העלה מלאים הם לריח ניחח אשה הוא ליהוה

²⁹כט ויקח משה את החזה ויניפהו תנופה לפני יהוה מאיל המלאים למשה היה למנה כאשר צוה יהוה את משה

³⁰ל ויקח משה משמן המשחה ומן הדם אשר על המזבח ויז על אהרן על בגדיו ועל בניו ועל בגדי בניו אתו ויקדש את אהרן את בגדיו ואת בניו ואת בגדי בניו אתו

³¹לא ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהו

³²לב והנותר בבשר ובלחם--באש תשרפו

³³לג ומפתח אהל מועד לא תצאו שבעת ימים--עד יום מלאת ימי מלאיכם כי שבעת ימים ימלא את ידכם

³⁴לד כאשר עשה ביום הזה--צוה יהוה לעשת לכפר עליכם

³⁵לה ופתח אהל מועד תשבו יומם ולילה שבעת ימים ושמרתם את משמרת יהוה ולא תמותו כי כן צויתי

³⁶לו ויעש אהרן ובניו--את כל הדברים אשר צוה יהוה ביד משה {ס}