Read כֶּתֶר אֲרָם צוֹבָא - Tanah Aleppo Codex ויקרא 9 Bible Online

ויקרא 9 - כֶּתֶר אֲרָם צוֹבָא - Tanah Aleppo Codex bible

ויקרא 9

¹א ויהי ביום השמיני קרא משה לאהרן ולבניו--ולזקני ישראל

²ב ויאמר אל אהרן קח לך עגל בן בקר לחטאת ואיל לעלה--תמימם והקרב לפני יהוה

³ג ואל בני ישראל תדבר לאמר קחו שעיר עזים לחטאת ועגל וכבש בני שנה תמימם לעלה

⁴ד ושור ואיל לשלמים לזבח לפני יהוה ומנחה בלולה בשמן כי היום יהוה נראה אליכם

⁵ה ויקחו את אשר צוה משה אל פני אהל מועד ויקרבו כל העדה ויעמדו לפני יהוה

⁶ו ויאמר משה זה הדבר אשר צוה יהוה תעשו--וירא אליכם כבוד יהוה

⁷ז ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה

⁸ח ויקרב אהרן אל המזבח וישחט את עגל החטאת אשר לו

⁹ט ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח

¹⁰י ואת החלב ואת הכלית ואת היתרת מן הכבד מן החטאת--הקטיר המזבחה כאשר צוה יהוה את משה

¹¹יא ואת הבשר ואת העור שרף באש מחוץ למחנה

¹²יב וישחט את העלה וימצאו בני אהרן אליו את הדם ויזרקהו על המזבח סביב

¹³יג ואת העלה המציאו אליו לנתחיה--ואת הראש ויקטר על המזבח

¹⁴יד וירחץ את הקרב ואת הכרעים ויקטר על העלה המזבחה

¹⁵טו ויקרב את קרבן העם ויקח את שעיר החטאת אשר לעם וישחטהו ויחטאהו כראשון

¹⁶טז ויקרב את העלה ויעשה כמשפט

¹⁷יז ויקרב את המנחה וימלא כפו ממנה ויקטר על המזבח--מלבד עלת הבקר

¹⁸יח וישחט את השור ואת האיל זבח השלמים אשר לעם וימצאו בני אהרן את הדם אליו ויזרקהו על המזבח סביב

¹⁹יט ואת החלבים מן השור ומן האיל--האליה והמכסה והכלית ויתרת הכבד

²⁰כ וישימו את החלבים על החזות ויקטר החלבים המזבחה

²¹כא ואת החזות ואת שוק הימין הניף אהרן תנופה לפני יהוה--כאשר צוה משה

²²כב וישא אהרן את ידו אל העם ויברכם וירד מעשת החטאת והעלה--והשלמים

²³כג ויבא משה ואהרן אל אהל מועד ויצאו ויברכו את העם וירא כבוד יהוה אל כל העם

²⁴כד ותצא אש מלפני יהוה ותאכל על המזבח את העלה ואת החלבים וירא כל העם וירנו ויפלו על פניהם