Read כֶּתֶר אֲרָם צוֹבָא - Tanah Aleppo Codex ירמיהו 1 Bible Online

ירמיהו 1 - כֶּתֶר אֲרָם צוֹבָא - Tanah Aleppo Codex bible

ירמיהו 1

¹א דברי ירמיהו בן חלקיהו מן הכהנים אשר בענתות בארץ בנימן

²ב אשר היה דבר יהוה אליו בימי יאשיהו בן אמון מלך יהודה בשלש עשרה שנה למלכו

³ג ויהי בימי יהויקים בן יאשיהו מלך יהודה עד תם עשתי עשרה שנה לצדקיהו בן יאשיהו מלך יהודה--עד גלות ירושלם בחדש החמישי {פ}

⁴ד ויהי דבר יהוה אלי לאמר

⁵ה בטרם אצורך (אצרך) בבטן ידעתיך ובטרם תצא מרחם הקדשתיך נביא לגוים נתתיך

⁶ו ואמר אהה אדני יהוה הנה לא ידעתי דבר כי נער אנכי {ס}

⁷ז ויאמר יהוה אלי אל תאמר נער אנכי כי על כל אשר אשלחך תלך ואת כל אשר אצוך תדבר

⁸ח אל תירא מפניהם כי אתך אני להצלך נאם יהוה

⁹ט וישלח יהוה את ידו ויגע על פי ויאמר יהוה אלי הנה נתתי דברי בפיך

¹⁰י ראה הפקדתיך היום הזה על הגוים ועל הממלכות לנתוש ולנתוץ ולהאביד ולהרוס--לבנות ולנטוע {פ}

¹¹יא ויהי דבר יהוה אלי לאמר מה אתה ראה ירמיהו ואמר מקל שקד אני ראה

¹²יב ויאמר יהוה אלי היטבת לראות כי שקד אני על דברי לעשתו {ס}

¹³יג ויהי דבר יהוה אלי שנית לאמר מה אתה ראה ואמר סיר נפוח אני ראה ופניו מפני צפונה

¹⁴יד ויאמר יהוה אלי מצפון תפתח הרעה על כל ישבי הארץ

¹⁵טו כי הנני קרא לכל משפחות ממלכות צפונה--נאם יהוה ובאו ונתנו איש כסאו פתח שערי ירושלם ועל כל חומתיה סביב ועל כל ערי יהודה

¹⁶טז ודברתי משפטי אותם על כל רעתם--אשר עזבוני ויקטרו לאלהים אחרים וישתחוו למעשי ידיהם

¹⁷יז ואתה תאזר מתניך וקמת ודברת אליהם את כל אשר אנכי אצוך אל תחת מפניהם--פן אחתך לפניהם

¹⁸יח ואני הנה נתתיך היום לעיר מבצר ולעמוד ברזל ולחמות נחשת--על כל הארץ למלכי יהודה לשריה לכהניה ולעם הארץ

¹⁹יט ונלחמו אליך ולא יוכלו לך כי אתך אני נאם יהוה להצילך {פ}