Read כֶּתֶר אֲרָם צוֹבָא - Tanah Aleppo Codex ירמיהו 10 Bible Online

ירמיהו 10 - כֶּתֶר אֲרָם צוֹבָא - Tanah Aleppo Codex bible

ירמיהו 10

¹א שמעו את הדבר אשר דבר יהוה עליכם--בית ישראל

²ב כה אמר יהוה אל דרך הגוים אל תלמדו ומאתות השמים אל תחתו כי יחתו הגוים מהמה

³ג כי חקות העמים הבל הוא כי עץ מיער כרתו מעשה ידי חרש במעצד

⁴ד בכסף ובזהב ייפהו במסמרות ובמקבות יחזקום ולוא יפיק

⁵ה כתמר מקשה המה ולא ידברו נשוא ינשוא כי לא יצעדו אל תיראו מהם כי לא ירעו וגם היטיב אין אותם {פ}

⁶ו מאין כמוך יהוה גדול אתה וגדול שמך בגבורה

⁷ז מי לא יראך מלך הגוים כי לך יאתה כי בכל חכמי הגוים ובכל מלכותם מאין כמוך

⁸ח ובאחת יבערו ויכסלו מוסר הבלים עץ הוא

⁹ט כסף מרקע מתרשיש יובא וזהב מאופז--מעשה חרש וידי צורף תכלת וארגמן לבושם מעשה חכמים כלם

¹⁰י ויהוה אלהים אמת הוא אלהים חיים ומלך עולם מקצפו תרעש הארץ ולא יכלו גוים זעמו {פ}

¹¹יא כדנה תאמרון להום אלהיא די שמיא וארקא לא עבדו יאבדו מארעא ומן תחות שמיא אלה {ס}

¹²יב עשה ארץ בכחו מכין תבל בחכמתו ובתבונתו נטה שמים

¹³יג לקול תתו המון מים בשמים ויעלה נשאים מקצה ארץ (הארץ) ברקים למטר עשה ויוצא רוח מאצרתיו

¹⁴יד נבער כל אדם מדעת הביש כל צורף מפסל כי שקר נסכו ולא רוח בם

¹⁵טו הבל המה מעשה תעתעים בעת פקדתם יאבדו

¹⁶טז לא כאלה חלק יעקב כי יוצר הכל הוא וישראל שבט נחלתו יהוה צבאות שמו {ס}

¹⁷יז אספי מארץ כנעתך--ישבתי (ישבת) במצור {ס}

¹⁸יח כי כה אמר יהוה הנני קולע את יושבי הארץ בפעם הזאת והצרתי להם למען ימצאו {ס}

¹⁹יט אוי לי על שברי נחלה מכתי ואני אמרתי אך זה חלי ואשאנו

²⁰כ אהלי שדד וכל מיתרי נתקו בני יצאני ואינם--אין נטה עוד אהלי ומקים יריעותי

²¹כא כי נבערו הרעים ואת יהוה לא דרשו על כן לא השכילו וכל מרעיתם נפוצה {פ}

²²כב קול שמועה הנה באה ורעש גדול מארץ צפון לשום את ערי יהודה שממה--מעון תנים {ס}

²³כג ידעתי יהוה כי לא לאדם דרכו לא לאיש הלך והכין את צעדו

²⁴כד יסרני יהוה אך במשפט אל באפך פן תמעטני

²⁵כה שפך חמתך על הגוים אשר לא ידעוך ועל משפחות אשר בשמך לא קראו כי אכלו את יעקב ואכלהו ויכלהו ואת נוהו השמו {פ}