Read כֶּתֶר אֲרָם צוֹבָא - Tanah Aleppo Codex ירמיהו 13 Bible Online

ירמיהו 13 - כֶּתֶר אֲרָם צוֹבָא - Tanah Aleppo Codex bible

ירמיהו 13

¹א כה אמר יהוה אלי הלוך וקנית לך אזור פשתים ושמתו על מתניך ובמים לא תבאהו

²ב ואקנה את האזור כדבר יהוה ואשם על מתני {פ}

³ג ויהי דבר יהוה אלי שנית לאמר

⁴ד קח את האזור אשר קנית אשר על מתניך וקום לך פרתה וטמנהו שם בנקיק הסלע

⁵ה ואלך ואטמנהו בפרת כאשר צוה יהוה אותי

⁶ו ויהי מקץ ימים רבים ויאמר יהוה אלי קום לך פרתה וקח משם את האזור אשר צויתיך לטמנו שם

⁷ז ואלך פרתה--ואחפר ואקח את האזור מן המקום אשר טמנתיו שמה והנה נשחת האזור לא יצלח לכל {פ}

⁸ח ויהי דבר יהוה אלי לאמר

⁹ט כה אמר יהוה ככה אשחית את גאון יהודה ואת גאון ירושלם--הרב

¹⁰י העם הזה הרע המאנים לשמוע את דברי ההלכים בשררות לבם וילכו אחרי אלהים אחרים לעבדם ולהשתחות להם ויהי כאזור הזה אשר לא יצלח לכל {ס}

¹¹יא כי כאשר ידבק האזור אל מתני איש כן הדבקתי אלי את כל בית ישראל ואת כל בית יהודה נאם יהוה להיות לי לעם ולשם ולתהלה ולתפארת ולא שמעו

¹²יב ואמרת אליהם את הדבר הזה {ס} כה אמר יהוה אלהי ישראל כל נבל ימלא יין ואמרו אליך--הידע לא נדע כי כל נבל ימלא יין

¹³יג ואמרת אליהם כה אמר יהוה הנני ממלא את כל ישבי הארץ הזאת ואת המלכים הישבים לדוד על כסאו ואת הכהנים ואת הנבאים ואת כל ישבי ירושלם--שכרון

¹⁴יד ונפצתים איש אל אחיו והאבות והבנים יחדו--נאם יהוה לא אחמול ולא אחוס ולא ארחם מהשחיתם

¹⁵טו שמעו והאזינו אל תגבהו כי יהוה דבר

¹⁶טז תנו ליהוה אלהיכם כבוד בטרם יחשך ובטרם יתנגפו רגליכם על הרי נשף וקויתם לאור ושמה לצלמות ישית (ושית) לערפל

¹⁷יז ואם לא תשמעוה במסתרים תבכה נפשי מפני גוה ודמע תדמע ותרד עיני דמעה כי נשבה עדר יהוה {ס}

¹⁸יח אמר למלך ולגבירה השפילו שבו כי ירד מראשותיכם עטרת תפארתכם

¹⁹יט ערי הנגב סגרו ואין פתח הגלת יהודה כלה הגלת שלומים {ס}

²⁰כ שאי (שאו) עיניכם וראי (וראו) הבאים מצפון איה העדר נתן לך--צאן תפארתך

²¹כא מה תאמרי כי יפקד עליך ואת למדת אתם עליך אלפים לראש הלוא חבלים יאחזוך כמו אשת לדה

²²כב וכי תאמרי בלבבך מדוע קראני אלה ברב עונך נגלו שוליך נחמסו עקביך

²³כג היהפך כושי עורו ונמר חברברתיו גם אתם תוכלו להיטיב למדי הרע

²⁴כד ואפיצם כקש עובר לרוח מדבר

²⁵כה זה גורלך מנת מדיך מאתי נאם יהוה אשר שכחת אותי ותבטחי בשקר

²⁶כו וגם אני חשפתי שוליך על פניך ונראה קלונך

²⁷כז נאפיך ומצהלותיך זמת זנותך על גבעות בשדה ראיתי שקוציך אוי לך ירושלם--לא תטהרי אחרי מתי עד {ס}