Read כֶּתֶר אֲרָם צוֹבָא - Tanah Aleppo Codex ירמיהו 14 Bible Online

ירמיהו 14 - כֶּתֶר אֲרָם צוֹבָא - Tanah Aleppo Codex bible

ירמיהו 14

¹א אשר היה דבר יהוה אל ירמיהו על דברי הבצרות

²ב אבלה יהודה ושעריה אמללו קדרו לארץ וצוחת ירושלם עלתה

³ג ואדריהם שלחו צעוריהם (צעיריהם) למים באו על גבים לא מצאו מים שבו כליהם ריקם--בשו והכלמו וחפו ראשם

⁴ד בעבור האדמה חתה כי לא היה גשם בארץ בשו אכרים חפו ראשם

⁵ה כי גם אילת בשדה ילדה ועזוב כי לא היה דשא

⁶ו ופראים עמדו על שפים שאפו רוח כתנים כלו עיניהם כי אין עשב

⁷ז אם עונינו ענו בנו--יהוה עשה למען שמך כי רבו משובתינו לך חטאנו

⁸ח מקוה ישראל מושיעו בעת צרה--למה תהיה כגר בארץ וכארח נטה ללון

⁹ט למה תהיה כאיש נדהם כגבור לא יוכל להושיע ואתה בקרבנו יהוה ושמך עלינו נקרא--אל תנחנו {ס}

¹⁰י כה אמר יהוה לעם הזה כן אהבו לנוע--רגליהם לא חשכו ויהוה לא רצם--עתה יזכר עונם ויפקד חטאתם {פ}

¹¹יא ויאמר יהוה אלי אל תתפלל בעד העם הזה לטובה

¹²יב כי יצמו אינני שמע אל רנתם וכי יעלו עלה ומנחה אינני רצם כי בחרב וברעב ובדבר אנכי מכלה אותם {ס}

¹³יג ואמר אהה אדני יהוה הנה הנבאים אמרים להם לא תראו חרב ורעב לא יהיה לכם כי שלום אמת אתן לכם במקום הזה {ס}

¹⁴יד ויאמר יהוה אלי שקר הנבאים נבאים בשמי--לא שלחתים ולא צויתים ולא דברתי אליהם חזון שקר וקסם ואלול (ואליל) ותרמות (ותרמית) לבם המה מתנבאים לכם {ס}

¹⁵טו לכן כה אמר יהוה על הנבאים הנבאים בשמי ואני לא שלחתים והמה אמרים חרב ורעב לא יהיה בארץ הזאת בחרב וברעב יתמו הנבאים ההמה

¹⁶טז והעם אשר המה נבאים להם יהיו משלכים בחצות ירושלם מפני הרעב והחרב ואין מקבר להמה--המה נשיהם ובניהם ובנתיהם ושפכתי עליהם את רעתם

¹⁷יז ואמרת אליהם את הדבר הזה תרדנה עיני דמעה לילה ויומם ואל תדמינה כי שבר גדול נשברה בתולת בת עמי--מכה נחלה מאד

¹⁸יח אם יצאתי השדה והנה חללי חרב ואם באתי העיר והנה תחלואי רעב כי גם נביא גם כהן סחרו אל ארץ ולא ידעו {ס}

¹⁹יט המאס מאסת את יהודה אם בציון געלה נפשך--מדוע הכיתנו ואין לנו מרפא קוה לשלום ואין טוב ולעת מרפא והנה בעתה

²⁰כ ידענו יהוה רשענו עון אבותינו כי חטאנו לך

²¹כא אל תנאץ למען שמך אל תנבל כסא כבודך זכר אל תפר בריתך אתנו

²²כב היש בהבלי הגוים מגשמים ואם השמים יתנו רבבים הלא אתה הוא יהוה אלהינו ונקוה לך--כי אתה עשית את כל אלה {פ}