Read כֶּתֶר אֲרָם צוֹבָא - Tanah Aleppo Codex ירמיהו 18 Bible Online

ירמיהו 18 - כֶּתֶר אֲרָם צוֹבָא - Tanah Aleppo Codex bible

ירמיהו 18

¹א הדבר אשר היה אל ירמיהו מאת יהוה לאמר

²ב קום וירדת בית היוצר ושמה אשמיעך את דברי

³ג וארד בית היוצר והנהו (והנה הוא) עשה מלאכה על האבנים

⁴ד ונשחת הכלי אשר הוא עשה בחמר--ביד היוצר ושב ויעשהו כלי אחר כאשר ישר בעיני היוצר לעשות {ס}

⁵ה ויהי דבר יהוה אלי לאמור

⁶ו הכיוצר הזה לא אוכל לעשות לכם בית ישראל--נאם יהוה הנה כחמר ביד היוצר כן אתם בידי בית ישראל {ס}

⁷ז רגע אדבר על גוי ועל ממלכה לנתוש ולנתוץ ולהאביד

⁸ח ושב הגוי ההוא מרעתו אשר דברתי עליו--ונחמתי על הרעה אשר חשבתי לעשות לו {ס}

⁹ט ורגע אדבר על גוי ועל ממלכה לבנות ולנטוע

¹⁰י ועשה הרעה (הרע) בעיני לבלתי שמע בקולי--ונחמתי על הטובה אשר אמרתי להיטיב אותו {ס}

¹¹יא ועתה אמר נא אל איש יהודה ועל יושבי ירושלם לאמר כה אמר יהוה הנה אנכי יוצר עליכם רעה וחשב עליכם מחשבה שובו נא איש מדרכו הרעה והיטיבו דרכיכם ומעלליכם

¹²יב ואמרו נואש כי אחרי מחשבותינו נלך ואיש שררות לבו הרע נעשה {פ}

¹³יג לכן כה אמר יהוה שאלו נא בגוים מי שמע כאלה שעררת עשתה מאד בתולת ישראל

¹⁴יד היעזב מצור שדי שלג לבנון אם ינתשו מים זרים קרים--נוזלים

¹⁵טו כי שכחני עמי לשוא יקטרו ויכשלום בדרכיהם שבילי עולם ללכת נתיבות דרך לא סלולה

¹⁶טז לשום ארצם לשמה שרוקת (שריקת) עולם כל עובר עליה ישם ויניד בראשו

¹⁷יז כרוח קדים אפיצם לפני אויב ערף ולא פנים אראם ביום אידם {ס}

¹⁸יח ויאמרו לכו ונחשבה על ירמיהו מחשבות--כי לא תאבד תורה מכהן ועצה מחכם ודבר מנביא לכו ונכהו בלשון ואל נקשיבה אל כל דבריו

¹⁹יט הקשיבה יהוה אלי ושמע לקול יריבי

²⁰כ הישלם תחת טובה רעה כי כרו שוחה לנפשי זכר עמדי לפניך לדבר עליהם טובה להשיב את חמתך מהם

²¹כא לכן תן את בניהם לרעב והגרם על ידי חרב ותהינה נשיהם שכלות ואלמנות ואנשיהם יהיו הרגי מות בחוריהם מכי חרב במלחמה

²²כב תשמע זעקה מבתיהם כי תביא עליהם גדוד פתאם כי כרו שיחה (שוחה) ללכדני ופחים טמנו לרגלי

²³כג ואתה יהוה ידעת את כל עצתם עלי למות--אל תכפר על עונם וחטאתם מלפניך אל תמחי והיו (ויהיו) מכשלים לפניך בעת אפך עשה בהם {ס}