Read כֶּתֶר אֲרָם צוֹבָא - Tanah Aleppo Codex ירמיהו 48 Bible Online

ירמיהו 48 - כֶּתֶר אֲרָם צוֹבָא - Tanah Aleppo Codex bible

ירמיהו 48

¹א למואב כה אמר יהוה צבאות אלהי ישראל הוי אל נבו כי שדדה הבישה נלכדה קריתים הבישה המשגב וחתה

²ב אין עוד תהלת מואב--בחשבון חשבו עליה רעה לכו ונכריתנה מגוי גם מדמן תדמי אחריך תלך חרב

³ג קול צעקה מחרונים--שד ושבר גדול

⁴ד נשברה מואב השמיעו זעקה צעוריה (צעיריה)

⁵ה כי מעלה הלחות (הלחית) בבכי יעלה בכי כי במורד חורנים צרי צעקת שבר שמעו

⁶ו נסו מלטו נפשכם ותהיינה כערוער במדבר

⁷ז כי יען בטחך במעשיך ובאוצרותיך גם את תלכדי ויצא כמיש (כמוש) בגולה כהניו ושריו יחד (יחדו)

⁸ח ויבא שדד אל כל עיר ועיר לא תמלט ואבד העמק ונשמד המישר--אשר אמר יהוה

⁹ט תנו ציץ למואב כי נצא תצא ועריה לשמה תהיינה מאין יושב בהן

¹⁰י ארור עשה מלאכת יהוה--רמיה וארור מנע חרבו מדם

¹¹יא שאנן מואב מנעוריו ושקט הוא אל שמריו ולא הורק מכלי אל כלי ובגולה לא הלך על כן עמד טעמו בו וריחו לא נמר {ס}

¹²יב לכן הנה ימים באים נאם יהוה ושלחתי לו צעים וצעהו וכליו יריקו ונבליהם ינפצו

¹³יג ובש מואב מכמוש כאשר בשו בית ישראל מבית אל מבטחם

¹⁴יד איך תאמרו גבורים אנחנו ואנשי חיל למלחמה

¹⁵טו שדד מואב ועריה עלה ומבחר בחוריו ירדו לטבח נאם המלך--יהוה צבאות שמו

¹⁶טז קרוב איד מואב לבוא ורעתו מהרה מאד

¹⁷יז נדו לו כל סביביו וכל ידעי שמו אמרו איכה נשבר מטה עז--מקל תפארה

¹⁸יח רדי מכבוד ישבי (ושבי) בצמא ישבת בת דיבון כי שדד מואב עלה בך שחת מבצריך

¹⁹יט אל דרך עמדי וצפי יושבת ערוער שאלי נס ונמלטה אמרי מה נהיתה

²⁰כ הביש מואב כי חתה הילילי (הילילו) וזעקי (וזעקו) הגידו בארנון כי שדד מואב

²¹כא ומשפט בא אל ארץ המישר--אל חלון ואל יהצה ועל מופעת (מיפעת)

²²כב ועל דיבון ועל נבו ועל בית דבלתים

²³כג ועל קריתים ועל בית גמול ועל בית מעון

²⁴כד ועל קריות ועל בצרה ועל כל ערי ארץ מואב--הרחקות והקרבות

²⁵כה נגדעה קרן מואב וזרעו נשברה--נאם יהוה

²⁶כו השכירהו כי על יהוה הגדיל וספק מואב בקיאו והיה לשחק גם הוא

²⁷כז ואם לוא השחק היה לך ישראל אם בגנבים נמצאה (נמצא) כי מדי דבריך בו תתנודד

²⁸כח עזבו ערים ושכנו בסלע ישבי מואב והיו כיונה תקנן בעברי פי פחת

²⁹כט שמענו גאון מואב גאה מאד גבהו וגאונו וגאותו ורם לבו

³⁰ל אני ידעתי נאם יהוה עברתו ולא כן בדיו לא כן עשו

³¹לא על כן על מואב איליל ולמואב כלה אזעק אל אנשי קיר חרש יהגה

³²לב מבכי יעזר אבכה לך הגפן שבמה נטישתיך עברו ים עד ים יעזר נגעו--על קיצך ועל בצירך שדד נפל

³³לג ונאספה שמחה וגיל מכרמל ומארץ מואב ויין מיקבים השבתי--לא ידרך הידד הידד לא הידד

³⁴לד מזעקת חשבון עד אלעלה עד יהץ נתנו קולם--מצער עד חרנים עגלת שלשיה כי גם מי נמרים למשמות יהיו

³⁵לה והשבתי למואב נאם יהוה מעלה במה ומקטיר לאלהיו

³⁶לו על כן לבי למואב כחללים יהמה ולבי אל אנשי קיר חרש כחלילים יהמה על כן יתרת עשה אבדו

³⁷לז כי כל ראש קרחה וכל זקן גרעה על כל ידים גדדת ועל מתנים שק

³⁸לח על כל גגות מואב וברחבתיה כלה מספד כי שברתי את מואב ככלי אין חפץ בו--נאם יהוה

³⁹לט איך חתה הילילו איך הפנה ערף מואב בוש והיה מואב לשחק ולמחתה לכל סביביו {ס}

⁴⁰מ כי כה אמר יהוה הנה כנשר ידאה ופרש כנפיו אל מואב

⁴¹מא נלכדה הקריות והמצדות נתפשה והיה לב גבורי מואב ביום ההוא כלב אשה מצרה

⁴²מב ונשמד מואב מעם כי על יהוה הגדיל

⁴³מג פחד ופחת ופח--עליך יושב מואב נאם יהוה

⁴⁴מד הניס (הנס) מפני הפחד יפל אל הפחת והעלה מן הפחת ילכד בפח כי אביא אליה אל מואב שנת פקדתם נאם יהוה

⁴⁵מה בצל חשבון עמדו מכח נסים כי אש יצא מחשבון ולהבה מבין סיחון ותאכל פאת מואב וקדקד בני שאון

⁴⁶מו אוי לך מואב אבד עם כמוש כי לקחו בניך בשבי ובנתיך בשביה

⁴⁷מז ושבתי שבות מואב באחרית הימים נאם יהוה עד הנה משפט מואב {ס}