Read כֶּתֶר אֲרָם צוֹבָא - Tanah Aleppo Codex ירמיהו 5 Bible Online

ירמיהו 5 - כֶּתֶר אֲרָם צוֹבָא - Tanah Aleppo Codex bible

ירמיהו 5

¹א שוטטו בחוצות ירושלם וראו נא ודעו ובקשו ברחובותיה אם תמצאו איש אם יש עשה משפט מבקש אמונה--ואסלח לה

²ב ואם חי יהוה יאמרו לכן לשקר ישבעו

³ג יהוה עיניך הלוא לאמונה--הכיתה אתם ולא חלו כליתם מאנו קחת מוסר חזקו פניהם מסלע מאנו לשוב

⁴ד ואני אמרתי אך דלים הם נואלו--כי לא ידעו דרך יהוה משפט אלהיהם

⁵ה אלכה לי אל הגדלים ואדברה אותם--כי המה ידעו דרך יהוה משפט אלהיהם אך המה יחדו שברו על נתקו מוסרות

⁶ו על כן הכם אריה מיער זאב ערבות ישדדם--נמר שקד על עריהם כל היוצא מהנה יטרף כי רבו פשעיהם עצמו משבותיהם

⁷ז אי לזאת אסלוח (אסלח) לך--בניך עזבוני וישבעו בלא אלהים ואשבע אותם וינאפו ובית זונה יתגודדו

⁸ח סוסים מיזנים משכים היו איש אל אשת רעהו יצהלו

⁹ט העל אלה לוא אפקד נאם יהוה ואם בגוי אשר כזה לא תתנקם נפשי {ס}

¹⁰י עלו בשרותיה ושחתו וכלה אל תעשו הסירו נטישותיה כי לוא ליהוה המה

¹¹יא כי בגוד בגדו בי בית ישראל ובית יהודה--נאם יהוה

¹²יב כחשו ביהוה ויאמרו לוא הוא ולא תבוא עלינו רעה וחרב ורעב לוא נראה

¹³יג והנביאים יהיו לרוח והדבר אין בהם כה יעשה להם {ס}

¹⁴יד לכן כה אמר יהוה אלהי צבאות יען דברכם את הדבר הזה הנני נתן דברי בפיך לאש והעם הזה עצים--ואכלתם

¹⁵טו הנני מביא עליכם גוי ממרחק בית ישראל נאם יהוה גוי איתן הוא גוי מעולם הוא--גוי לא תדע לשנו ולא תשמע מה ידבר

¹⁶טז אשפתו כקבר פתוח כלם גבורים

¹⁷יז ואכל קצירך ולחמך יאכלו בניך ובנותיך--יאכל צאנך ובקרך יאכל גפנך ותאנתך ירשש ערי מבצריך אשר אתה בטח בהנה--בחרב

¹⁸יח וגם בימים ההמה נאם יהוה לא אעשה אתכם כלה

¹⁹יט והיה כי תאמרו תחת מה עשה יהוה אלהינו לנו את כל אלה ואמרת אליהם כאשר עזבתם אותי ותעבדו אלהי נכר בארצכם--כן תעבדו זרים בארץ לא לכם {פ}

²⁰כ הגידו זאת בבית יעקב והשמיעוה ביהודה לאמר

²¹כא שמעו נא זאת עם סכל ואין לב עינים להם ולא יראו אזנים להם ולא ישמעו

²²כב האותי לא תיראו נאם יהוה אם מפני לא תחילו אשר שמתי חול גבול לים חק עולם ולא יעברנהו ויתגעשו ולא יוכלו והמו גליו ולא יעברנהו

²³כג ולעם הזה היה לב סורר ומורה סרו וילכו

²⁴כד ולוא אמרו בלבבם נירא נא את יהוה אלהינו הנתן גשם וירה (יורה) ומלקוש בעתו שבעת חקות קציר ישמר לנו

²⁵כה עונותיכם הטו אלה וחטאותיכם מנעו הטוב מכם

²⁶כו כי נמצאו בעמי רשעים ישור כשך יקושים הציבו משחית אנשים ילכדו

²⁷כז ככלוב מלא עוף כן בתיהם מלאים מרמה על כן גדלו ויעשירו

²⁸כח שמנו עשתו גם עברו דברי רע--דין לא דנו דין יתום ויצליחו ומשפט אביונים לא שפטו

²⁹כט העל אלה לא אפקד נאם יהוה אם בגוי אשר כזה לא תתנקם נפשי {ס}

³⁰ל שמה ושערורה נהיתה בארץ

³¹לא הנבאים נבאו בשקר והכהנים ירדו על ידיהם ועמי אהבו כן ומה תעשו לאחריתה