Read כֶּתֶר אֲרָם צוֹבָא - Tanah Aleppo Codex איכה 3 Bible Online

איכה 3 - כֶּתֶר אֲרָם צוֹבָא - Tanah Aleppo Codex bible

איכה 3

¹א אני הגבר ראה עני בשבט עברתו

²ב אותי נהג וילך חשך ולא אור

³ג אך בי ישב יהפך ידו כל היום {ס}

⁴ד בלה בשרי ועורי שבר עצמותי

⁵ה בנה עלי ויקף ראש ותלאה

⁶ו במחשכים הושיבני כמתי עולם {ס}

⁷ז גדר בעדי ולא אצא הכביד נחשתי

⁸ח גם כי אזעק ואשוע שתם תפלתי

⁹ט גדר דרכי בגזית נתיבתי עוה {ס}

¹⁰י דב ארב הוא לי אריה (ארי) במסתרים

¹¹יא דרכי סורר ויפשחני שמני שמם

¹²יב דרך קשתו ויציבני כמטרא לחץ {ס}

¹³יג הביא בכליתי בני אשפתו

¹⁴יד הייתי שחק לכל עמי נגינתם כל היום

¹⁵טו השביעני במרורים הרוני לענה {ס}

¹⁶טז ויגרס בחצץ שני הכפישני באפר

¹⁷יז ותזנח משלום נפשי נשיתי טובה

¹⁸יח ואמר אבד נצחי ותוחלתי מיהוה {ס}

¹⁹יט זכר עניי ומרודי לענה וראש

²⁰כ זכור תזכור ותשיח (ותשוח) עלי נפשי

²¹כא זאת אשיב אל לבי על כן אוחיל {ס}

²²כב חסדי יהוה כי לא תמנו כי לא כלו רחמיו

²³כג חדשים לבקרים רבה אמונתך

²⁴כד חלקי יהוה אמרה נפשי על כן אוחיל לו {ס}

²⁵כה טוב יהוה לקוו לנפש תדרשנו

²⁶כו טוב ויחיל ודומם לתשועת יהוה

²⁷כז טוב לגבר כי ישא על בנעוריו {ס}

²⁸כח ישב בדד וידם כי נטל עליו

²⁹כט יתן בעפר פיהו אולי יש תקוה

³⁰ל יתן למכהו לחי ישבע בחרפה {ס}

³¹לא כי לא יזנח לעולם אדני

³²לב כי אם הוגה ורחם כרב חסדיו

³³לג כי לא ענה מלבו ויגה בני איש {ס}

³⁴לד לדכא תחת רגליו כל אסירי ארץ

³⁵לה להטות משפט גבר נגד פני עליון

³⁶לו לעות אדם בריבו אדני לא ראה {ס}

³⁷לז מי זה אמר ותהי אדני לא צוה

³⁸לח מפי עליון לא תצא הרעות והטוב

³⁹לט מה יתאונן אדם חי גבר על חטאו {ס}

⁴⁰מ נחפשה דרכינו ונחקרה ונשובה עד יהוה

⁴¹מא נשא לבבנו אל כפים אל אל בשמים

⁴²מב נחנו פשענו ומרינו אתה לא סלחת {ס}

⁴³מג סכותה באף ותרדפנו הרגת לא חמלת

⁴⁴מד סכותה בענן לך מעבור תפלה

⁴⁵מה סחי ומאוס תשימנו בקרב העמים {ס}

⁴⁶מו פצו עלינו פיהם כל איבינו

⁴⁷מז פחד ופחת היה לנו השאת והשבר

⁴⁸מח פלגי מים תרד עיני על שבר בת עמי {ס}

⁴⁹מט עיני נגרה ולא תדמה מאין הפגות

⁵⁰נ עד ישקיף וירא יהוה משמים

⁵¹נא עיני עוללה לנפשי מכל בנות עירי {ס}

⁵²נב צוד צדוני כצפור איבי חנם

⁵³נג צמתו בבור חיי וידו אבן בי

⁵⁴נד צפו מים על ראשי אמרתי נגזרתי {ס}

⁵⁵נה קראתי שמך יהוה מבור תחתיות

⁵⁶נו קולי שמעת אל תעלם אזנך לרוחתי לשועתי

⁵⁷נז קרבת ביום אקראך אמרת אל תירא {ס}

⁵⁸נח רבת אדני ריבי נפשי גאלת חיי

⁵⁹נט ראיתה יהוה עותתי שפטה משפטי

⁶⁰ס ראיתה כל נקמתם--כל מחשבתם לי {ס}

⁶¹סא שמעת חרפתם יהוה כל מחשבתם עלי

⁶²סב שפתי קמי והגיונם עלי כל היום

⁶³סג שבתם וקימתם הביטה אני מנגינתם {ס}

⁶⁴סד תשיב להם גמול יהוה כמעשה ידיהם

⁶⁵סה תתן להם מגנת לב תאלתך להם

⁶⁶סו תרדף באף ותשמידם מתחת שמי יהוה {פ}